In'installaziun melna, plazzada sco ina paraid radunda en in rudè, renda attent a la plazza davant il «Museum für Gestaltung» a Turitg. Sch'ins va sper l'installaziun vi ed entra en il museum, spetgan anc dapli installaziuns e creaziuns.
-
Bild 1 von 3. L'installaziun melna davant il museum per creaziun a Turitg. Bildquelle: RTR.
-
Bild 2 von 3. Anita Simeon Lutz, architecta e co-curatura da las «Zurich Design Weeks». Bildquelle: RTR.
-
Bild 3 von 3. Las «Zurich Design Weeks» cuzzan dals 4 fin ils 14 da settember. Bildquelle: RTR.
Per la quarta giada pon designers e designras da l'entira Svizra preschentar lur innovaziuns a las «Zurich Design Weeks» a Turitg. L'architecta e co-curatura da quest eveniment da design, Anita Simeon Lutz, declera: «I deva gia bleras iniziativas a Turitg, ma nus vulevan metter in tetg sur quellas e render accessibel il design propi a tuttas ed a tuts.»
Tenor la co-curatura saja quai l'event il pli grond da design en Svizra. I dat da vesair ina massa: mobiglias coluradas, elements da bogn or da material regenerabel u chalzers senza cola. Ina gronda part giogan a las «Zurich Design Weeks» ils giuvens e las giuvnas – da 5 scolas autas da design dastga numnadamain mintgamai ina persuna preschentar ses design.
Igl è ina da nossas intenziuns principalas da porscher ina plattafurma als giuvens.
Ina da questas designras giuvnas è Medea Laim. La dunna da 25 onns, oriunda da Lai, abita oz a Turitg. Sia passiun è la bischuteria. Far rintgs, chadainas, ureglins – cun cristals u senza, aur u argient.
-
Bild 1 von 3. Medea Laim ha 25 onns ed è oriunda da Lai. Bildquelle: RTR.
-
Bild 2 von 3. Sut il num «Medusa Metall» venda ella sias creaziuns e ses designs. Bildquelle: RTR.
-
Bild 3 von 3. Dus da ses designs: la «Feuerzeugkette» ed il «Spohtsummer Sunna Ahänger». Bildquelle: RTR.
Il zercladur ha ella terminà ses studi a la scola auta d'art a Turitg. Sia lavur da bachelor è stada in project cun il num «Ring for Bling» – «Quai vul dir: ti ma pos dar in telefon per ch'jau fetsch bischutaria», declara Medea Laim. «Jau vuleva simplamain far insatge, ch'ha quest'energia d'in servetsch furnitur.»
Esser qua è ina gronda schanza – jau vegn adina puspè en contact cun glieud nova.
Cun ses moped arriva ella lura mintgamai là, nua ch'ella è dumandada per seser ensemen e far bischutaria – en ina bar u ad ina festa d'anniversari. En il «Museum für Gestaltung» a Turitg ha ella in agen spazzi per sia lavur. I sbrinzla e traglischa nua ch'ins guarda: bischutaria d'aur, placats pincs, cristals violets e blaus.
Jau sun vegnida sin il num «Medusa Metall» perquai ch'jau hai num Medea ed jau hai adina puspè fatg furmas da serps en mes designs – quel fascheva pia senn.
La designra e graficra è ina da tschintg che dastga represchentar sia scola auta a las «Zurich Design Weeks» a Turitg – ina grond'onur per Medea Laim, ed er ina schanza.
-
Bild 1 von 3. Il moped che Medea Laim drova per ses project «Ring for Bling». Bildquelle: RTR.
-
Bild 2 von 3. Per la dunna da 25 onns èsi ina gronda schanza da preschentar ses designs a Turitg. Bildquelle: RTR.
-
Bild 3 von 3. Medea Laim fa rintgs, cadeinas, cularins e rintgas. Bildquelle: RTR.
Questa seria d'events «Ring for Bling» haja er in messadi pli profund: en in mund, en il qual la vita ed il mintgadi daventan adina pli digitals, saja quai in moviment cuntrari. Ina lavur plauna cun ils mauns, davent dal puls svelt e hectic da la vita digitala.
Fin la fin da las «Zurich Design Weeks», ils 14 da settember, vegn Medea Laim a preschentar sia lavur e sias creaziuns. Schizunt il moped, cun il qual ella realisescha il project «Ring for Bling», stat en il «Museum für Gestaltung» a Turitg.