Siglir tar il cuntegn
cuntegn

SwissSkills2018 Fissan Swiss Skills pussaivels er en il Grischun?

Il Cussegl grond ha surdà a la regenza grischuna l'incumbensa da sclerir sch'i fiss pussaivel dad organisar en il Grischun campiunadis da professiuns svizzers sco er mundials. Perquai ha cunzunt il schef da l'Uffizi per la furmaziun professiunala guardà pli precis sin ils Swiss Skills a Berna.

Ils dus collegas d'uffizi: Curdin Tuor (san.) e Theo Ninck.
Legenda: Ils dus collegas d'uffizi: Curdin Tuor (san.) e Theo Ninck. RTR, Gion Gieri Flepp

Tar la visita a Berna è svelt sa mussà ch'in criteri central per decider sch'i fiss pussaivel d'organisar l'eveniment u betg, è la surfatscha cuverta che stat a disposiziun.

Sin l'areal da la Bernexpo datti trais hallas grondas cun plirs plauns, 8 tendas grondas ed anc plaz da lavur ordavert. La pli gronda halla ha ina surfatscha da bun 16'000 meters quadrat. Per cumparegliar: La Stadthalle a Cuira ha ina surfatscha da bun 2'200 meters quadrat e la pli gronda infrastructura en il Grischun, il center da congress a Tavau porscha bun 12'000 meters quadrat sut in tetg.

Tenor Curdin Tuor èsi fitg probabel ch'ins veglia mantegnair pli u main questa grondezza, er tar las proximas ediziuns. E lura saja la dumonda sch'ins possia porscher questa surfatscha u sch'i dettia la pussaivladad da reparter l'event sin plirs lieus.

Pliras persunas stattan enturn in baun da lavur nua ch'i vegn reparà instruments.
Legenda: La delegaziun Grischuna durant la guida tras la part da las professiuns pitschnas sco construiders e reparaders d'instruments. RTR, Gion Gieri Flepp

Las uniuns professiunalas decidan

Nua, quant lunga, quant gronda e cura che la proxima ediziun dals Swiss Skills vegnia, quai na decidia ni la politica ni la Confederaziun, uschia Theo Ninck, il vicepresident dal comité d'organisaziun da l'ediziun a Berna e collega d'uffizi da Curdin Tuor. Questa decisiun giascha sulettamain tar las uniuns professiunalas. Uschia èsi als chantuns da persvader quellas dad organisar ils campiunadis sin lur territori.

E dal reminent, betg mo ils Grischuns han in'incumbensa dal parlament. Er Theo Ninck ha uffizialmain l'incumbensa da s'engaschar per tegnair ils Swiss Skills a Berna.

Che gia la proxima ediziun dals Swiss Skills, sch'i resta tar il ritmus da mintga quatter onns, vegnia en il Grischun na vesa Curdin Tuor betg sco fitg realistic. La lavur d'organisaziun e preparaziun ordavant saja numnadamain enorma.

RR actualitad 07:00