Sin il campus medicinal a Tavau duai dar in ulteriur edifizi da perscrutaziun. Ils custs totals per quel muntan a 19,95 milliuns francs. La regenza grischuna ha uss concedì ina contribuziun da maximal 3,2 milliuns francs. Quai en il rom dal sustegn per infrastructura, relevanta per il sistem. Era la vischnanca da Tavau dat 650'000 francs.
Il chantun quinta ch'i dat uschia ils proxims 10 onns almain 45 novas plazzas da lavur aut-qualifitgadas a Tavau. Cun quest bajetg fetschia Tavau in pass grond en direcziun center da cumpetenza internaziunal da muntada per la perscrutaziun e scolaziun medicinala. Uschia vegnia la collavuraziun intensiva tranter clinica, perscrutaziun e scolaziun sin l'areal vinavant rinforzada. L'attractivitad e la cumpetitivitad sco er l'innovaziun da la regiun Partenz/Tavau, ma er da l'entir chantun Grischun vegnia augmentada.
