Er quest onn porscha la Pro Senectute in telefon da Nadal. Las tschintg istorgettas duajan porscher tempra da Nadal, divertiment e passatemp er durant il temp da pandemia, di Curdin Casaulta da la Pro Senectute. Quai mussia era il fatg che fitg bleras persunas hajan nizzegia la purschida. En tut hajan dapli che 1’500 persunas telefonà l’onn passà e tadlà en tut 190 uras las istorgias da Nadal.
Istorgias tudestgas ma betg rumantschas e talianas
Quest onn ha la Pro Senectute tschernì cun Romana Ganzoni, Andrea Zogg e Christian Ruch trais novas persunas che prelegian lur istorgias. Romana Ganzoni ha perquai prelegì trais atgnas istorgias unicas per questa purschida. Dentant saja ella stada stutta che la Pro Senectute na vuleva betg istorgias per exempel era per rumantsch. Ella haja purschì ina da sias istorgias era per rumantsch, quai che fiss tenor l'autura en in chantun triling era la vaira via. Era haja ella proponì Vincenzo Todisco sco pussaivel autur da lingua taliana, di Romana Ganzoni. En in chantun triling saja quai necessari da resguardar tuts e betg sclauder persunas da las minoritads linguisticas. La Pro Senectute vegn a far ponderaziuns in auter onn, sche insumma porscher anc ina giada il telefon da Nadal e lura er per tut las linguas chantunalas.
L'istorgia rumantscha da Romana Ganzoni: «L'angelin da Nadal – la verdad»
Cunquai ch'il telefon da Nadal da la Pro Senectute na porscha betg istorgias rumantschas, datti tar RTR ina istorgia da Nadal rumantscha da Romana Ganzoni.
