Mez matg elegia il suveran grischun sia nova regenza. En la naiv da Lai èn la candidata ed ils tschintg candidats per la regenza s'inscuntrads per ir communablamain cun skis, e suenter respunder dumondas en il rom d'in podium da discussiun. Tranter auter han er scolaras e scolars da Vaz dastgà far dumondas a Carmelia Maissen (AdC), Roman Hug (PPS), Martin Bühler (PLD), Marcus Caduff (AdC), Jon Domenic Parolini (AdC) e Peter Peyer (PS). Il di da skis cun podium è organisà da las Pendicularas grischunas e metta dumondas dal turissem en il center.
Cumpetenzas socialas e cumpetenzas dal fatg
A chaschun dal di da skis avain nus vulì savair, tge cumpetenzas ch'èn impurtantas per restar u far il pass en la regenza. Tenor il sextet èsi impurtant
- da funcziunar en il collectiv,
- chattar soluziuns communablas,
- avair perseveranza e pel dira, dentant er calma
- ed ina buna purziun curaschi per ir novas vias.
Ucraina, turissem e spazi da viver per indigens
Ils temas da discussiun èn stads vasts: Sper il tema actual da la guerra en l'Ucraina e sias consequenzas èn per exempel il turissem, il spazi da viver per indigens u er la protecziun d'ambient stads en il focus. Cunquai ch'il spectrum tematic è stà fitg vast, n'è la discussiun betg ida propi a profund.
In podcast politic en connex cun las elecziuns grischunas dal 2022.
Per pudair abunar quest podcast duvrais Vus ina software cumpatibla cun podcast u ina app. Sche Vossa app n'è betg en la glista sura, lura pudais copiar la feed URL manual en Vossa app da podcast u software.
