Um, circa 50 onns, da professiun interprendider u pur e politicamain dal center dretg – quai è il tipic deputà dal Cussegl grond. Quai mussan las datas che Smartvote ha rimnà cun in questiunari da las candidatas ed ils candidats per il parlament grischun.
Tge deputada nova è quant dretga e tge deputà nov quant sanester? Sin in clic chattais la visualisaziun interactiva. Igl è dentant necessari da selectar persunas elegidas e lura visualisar.
Bun da savair: Smartvote visualisescha be quellas persunas che han respundì il questiunari. Betg tuttas candidatas e candidats han fatg quai.
Quant serrada è ina partida?
Cun la midada da sistem èn ils dus pols politics (PS e PPS) vegnids rinforzads. La visualisaziun da Smartvote mussa quant serrada che mintga partida è.
Pli giuvegn e pli feminin
La giuvna en il parlament è er la proxima legislatura la deputada socialdemocratica Julia Müller (Trin), ella ha 25 onns. Il vegl tranter ils parlamentaris è il deputà da la Partida populara Pietro Della Cà (Brusio), cun 74 onns. Congualà cun il parlament vegl è quel che va en funcziun l'avust in zic pli giuven. La vegliadetgna media è tar 50,4 onns – avant era la vegliadetgna media tar 53,6 onns.
Il parlament è pia vegnì pli giuven – dentat er pli feminin. Dal 2018-2022 era la cumpart da dunnas anc tar 22% (26 dunnas) – en la proxima legislatura tutga mintga terz sez ad ina dunna – pia 40 da 120 èn deputadas.
En il temp liber fan quellas e quels il pli gugent sport sco ir cun skis, ir cun velo u viandar, prendan temp per la famiglia, cultura u per leger.
Il num il pli frequent en il Cussegl grond è Martin – en tut hai otg Martins, els avessan pia grondezia da fracziun. Ils Martins èn però repartids sur las partidas – sch'i vegnessan propi ad in consens è pia in'autra dumonda.
Era tge professiuns ch'èn las pli derasadas tranter deputadas e deputads mussa la statistica. Igl èn surtut interprendidras, purs, mainafatschenta u scolastas.
