Siglir tar il cuntegn

Header

audio
Schiers n'ha betg vulì il traffic da transit tras il vitg
Or da Actualitad dals 26.01.2022.
laschar ir. Durada: 3 minutas 24 Secundas.
cuntegn

Traffic da transit tras vitg Schiers ha serrà sortida da la via naziunala

La dumengia passada è la vischnanca da Schiers stada unfisa. Suenter ch’il traffic stagnava sin la via principala direcziun Landquart ha Schiers serrà la sortida en l’ost da la vischnanca ed uschia impedì che la lavina d’autos maina ina giada dapli tras il vitg.

La via da transit tras il Partenz, la N28, tutga a la Confederaziun, uschia che lezza di atgnamain nua ch’i va atras. La vischnanca po però sa basar sin l’autonomia communala. Cunquai ch’ella sto garantir ch’ils servetschs d’urgenza, sco ambulanza e pumpiers, pon adina atras il vitg, po la vischnanca intervegnir. La fin d’emna passada ha Schiers empruvà che automobilistas ed automobilist ch’èn da viadi da la val ora svieschan da la via da transit sin la via che maina tras il vitg.

Da circa las 15:30 hajan ins decis da serrar la sortida, ha il president communal da Schiers, Ueli Thöny ha declerà envers RTR. Perquai haja el clamà duas persunas dal securitas sin il plaz. L’uffizi da construcziun communal haja purtà e montà ils signals traffic. La polizia chantunala saja be stada al lieu per controllar che la signalisaziun saja fatga a moda correcta, uschia il president communal. Enfin las 19:30 saja la situaziun puspè sa normalisada ed i saja puspè stà pussibel d'avrir la sortida per tut il traffic.

4 fin 6 giadas l'onn

L’emprova haja funcziunà e tras Schiers n’haja betg gì traffic, malgrà ch’intgins automobilists ed automobilistas hajan tuttina empruvà da guntgir sin vias lateralas. Sche necessari veglia Schiers puspè serrar la sortida da la via da transit. Però na dovria betg mintga dumengia questa mesira, accentuescha il president communal. El partia dal fatg ch’i dovria quella maximalmain 4 fin 6 giadas, tranter mez december e fin favrer – tut tenor la situaziun da naiv e da l’aura.

RTR actualitad 12:00

Artitgels legids il pli savens