L’interess vid la loipa da notg è grond. Blers arrivan la saira cun la famiglia, cun ina gruppa dad amis ed amias u sco pèrin. In dals trais parcadis era gia plain dapi il cumenzament. Las temperaturas èn tranter dus e trais grad celsius, agreabel per far sport en l'aria frestga. La glina, ch'era dacurt plaina, è clera e fa l'ir cun skis da passlung la notg anc in pau pli spezial. La loipa da notg a Trin mesira 3,3 kilometers, latiers datti ina prolungaziun da 2 kilometers. En media han las sportistas ed ils sportists 30 minutas per ina runda.
Las passlunghistas ed ils passlunghists
Per Arnold Cadalbert èsi ina premiera sin la loipa da notg. El s'inscuntra cun ses amis per far in pèr rundas. Suenter si'emprima runda sin la loipa da notg è el in pau ord flad, ma fitg cuntent cun la loipa. Andre Magnin e sia dunna han pir avant curt temp puspè cumenza da far. Ussa giaudan els da vegnir a Trin sur mezdi u da visitar differentas loipas en il chantun. Questa saira vulan els far trais rundas, 15 kilometers. Intgins han gia fatg lur rundas – Carlo Monn è cuntent cun sia prestaziun dad oz. El fa passlung per divertiment e per trenament, en las dretgas proporziuns.
Oz èsi stà fitg bel: Las loipas eran preparadas super ed igl è stà bellezza dad ir.
Carmen Maurer è pronta per sias rundas: 15 kilometers vul ella far questa saira. La giuvna sportista trenescha pliras giadas l’emna sin differentas loipas. Ella fa quai per avair ina variaziun da la lavur. Ella ha dentant er ina challenge: Far 100 kilometers il schaner. In pli rutinà sin la loipa è Nino Gritti. El trenescha regularmain sin la loipa da Trin. Per l'Engiadinais è quai ina bellezza da vegnir suenter la lavur vi dal computer a far in pèr rundas. El lauda la qualitad da las loipas: Era cun pauca naiv saja quai flot dad ir.