Siglir tar il cuntegn

Header

video
Di d'acziun per persunas tschorvas en il traffic
Or da Telesguard dals 15.10.2021.
abspielen. Laufzeit 3 minutas 25 Sekunden.
cuntegn

Tschorvs en il traffic La channa alva munta «stop»

Sa muventar sco persuna tschorva u cun impediment da vesida en il traffic è ina sfida. Da principi valess la regla: Sch'ina persuna tegn ora e lascha pender la channa alva da tschorvs ston tut ils vehichels tegnair airi e laschar traversar. Ma quai è pli simpel ditg che fatg.

Per blers è ina tala situaziun nua ch'ina persuna tschorva u cun impediment da vesida vul traversar la via probabel tut auter che usitada. Perquai han la polizia da la citad e l'uniun per persunas tschorvas e cun impediments da vesida trenà gist quai sin las vias da Cuira. E gia las primas emprovas han mussà che la regla n'è savens betg clera als automobilists u automobilistas ubain che l'in u l'auter n'ha simplamain er betg fatg stim da la persuna che stenda ora la channa alva a l'ur da la via.

audio
Dretgs da persunas cun channa alva
aus Actualitad vom 16.10.2021.
abspielen. Laufzeit 4 minutas 34 Sekunden.

Silvio Derungs da Dardin è dapi passa 12 onns tschorv ed ha quai di traversà pliras giadas la via per sensibilisar persunas ch'èn da viadi cun auto, velo ed auters vehichels. Perquai che betg tuts e tuttas èn attentas u pertschertas da la regla saja ina gronda sfida da savair sch'in auto frainia uss u betg e d'esser segir cura ch'el possia traversar la via u betg.

Mobilitad electrica è ina gronda sfida supplementara

Il pli grev saja cun ils velos, principalmain velos electrics. Ed ins na possia probablamain er midar nagut.

Ils velos d'electro van pli e pli spert. Quai è segir ina gronda sfida, pertge quels vegnan cun 25 km/h enturn la storta, qua n'han ins nagina schanza.
Autur: Silvio Derungs tschorv dapi passa 12 onns

En connex cun ils autos electrics vesess l'um da 37 onns ina pussaivla schliaziun che pudess gidar. I saja er gia en discussiun che quels stuessien far in tun cura ch'els van sut 20 km l'ura. Quai fiss tenor Silvio Derungs in grond agid. Ma il mument na sajan ni autos cumplettamain electrics ni autos ibrids uschè lunsch. Sch'i saja ruassaivel en il conturn, possian ins anc udir la canera da las rodas, uschiglio saja grev. En general fetschian caneras sco p. ex. da plazzals, uffants che termaglian u er in helicopter grev da s'orientar accusticamain en il traffic.

Bilantscha plitost negativa da l'exercizi a Cuira

L'instructur da traffic da la polizia da la citad da Cuira, Gian-Rico Keller ch'ha observà ed inditgà als collegas automobilistas ed automobilists n'è betg stà cuntent cun quai ch'el ha vis.

Per part fai in pau tema, gnanc ina giada pronts da franar. Jau na sai betg nua che quella glieud guarda, cun ils patratgs gia vid il shopping... Sco tschorv na traversass jau betg gugent la via.
Autur: Gian-Rico Keller instructur da traffic tar la polizia da la citad da Cuira

Che la channa alva saja da principi in cler segn, bain visibel han er duas automobilistas confermà. Ma er ch'i saja magari grev da vesair tut ed er anc il dretg mument en la truscha dal traffic en la citad. Quai correspunda a l'experientscha da Silvio Derungs che di er: «Pli pauc traffic ch'i ha e meglier ch'i funcziuna». Vul dir en in vitget funcziunescha il traversar la via cun la channa alva meglier ch'en ina citad cun bler traffic e fullas. Chastis n'hai questa giada betg dà, tar l'acziun a Cuira. I gieva be per sensibilisar la glieud.

Sensibilisar, sensibilisar ed anc ina giada sensibilisar

Il pli grond agid sco er potenzial vesa Silvio Derungs en la sensibilisaziun da la glieud: Mussar e far attent sin las reglas e la situaziun en curs d'auto u tar l'examen. La sensibilisaziun saja segir il punct nua ch'ins stoppia investir pertge ch'il traffic saja qua e sminuir lez na giaja betg. Tenor el sentian ins era gia las stentas en chaussa e ch'i haja in effect. Tuttina dovria en in chantun plitost champester sco il Grischun probablamein dapli lavur perquai ch'ins vesia simplamain pli paucas persunas tschorvas u cun impediment da vesida en il traffic che p. ex. en la citad da Turitg.

Ord l'archiv:

Inscunters cun persunas che han las medemas sfidas èn impurtants. Per sa barattar ed emprender nov. A Mustér hai dà il 1985 in inscunter ch'il Telesguard ha visità.

video
Impedids da vesida e tschocs
Or da Telesguard dals 12.10.1985.
abspielen. Laufzeit 2 minutas 6 Sekunden.

RTR actualitad 08:00

Artitgels legids il pli savens

Scrollar a sanestra Scrollar a dretga