Las pendicularas en Grischun han transportà questa stad dapli giasts che anc avant la pandemia. Cumpareglià cun las cifras dal 2019 è il dumber d'emprimas entradas creschì per 31% ils mais da matg enfin il fanadur. Era la svieuta è creschida (+16%), communitgescha la Federaziun da las pendicularas svizras. Cifras creschentas han registrà però mo il Grischun ed il Tessin.
Sur l'entira Svizra mendras cifras
Vis sur l’entira Svizra haja dà questa stad 37% damain emprimas entradas e 33% damain svieuta. Entant che Grischun e Tessin registreschan pia cifras nairas - fan tschellas regiuns cifras cotschnas. Il pli martgant è il minus en regiuns ch’èn dependentas da giasts internaziunals.
Stagiun da stad adina pli impurtanta
Las pendicularas en Svizra vivan bain anc adina per 74% da las entradas da las stagiuns d'enviern. La cumpart da la stagiun da stad crescha però onn per onn. Ils ultims 10 onns è questa cumpart sa dublegiada da 13% sin 26%.
Clom per sustegn per il «servis public»
La federaziun da las pendicularas svizras cloma per agid finanzial per la branscha che saja relevanta per il sistem. Actualmain prestian las pendicularas in servis public turistic, schegea che la rentabilitad na saja pervi da la crisa betg garantida. E senza questa purschida da las pendicularas fissian las regiuns alpinas actualmain en «fiasco economic», scriva la federaziun.