Siglir tar il cuntegn

Header

video
L’Uniun purila grischuna fa grondas pretensiuns en connex cun il luf
Or da Telesguard dals 03.05.2022.
laschar ir. Durada: 2 minutas 58 Secundas.
cuntegn

Uniun purila grischuna Mintga 5avel candidat sustegna pretensiuns da regular lufs

Il svilup senza cunfin da la populaziun da lufs en il Grischun saja ina situaziun insupportabla, scriva l’Uniun purila grischuna. Ella pretenda che la politica ageschia resolut, ed ha preschentà a las candidatas ed als candidats per il Cussegl grond ina charta da lufs cun trais pretensiuns.

Passa 100 da las circa 500 candidatas e dals candidats hajan suttascrit la charta, annunzia l’Uniun purila grischuna. Quellas e quels vegnian a s’engaschar politicamain en il senn da la charta.

Quai pretenda l’Uniun purila en sia charta da lufs:

  • En il Grischun datti maximalmain dus trieps che na crodan betg si. Quai tanscha per ademplir l’obligaziun internaziunala per mantegnair la spezia. Quintà per l’entira Europa muntass quai in dumber da circa 30’000 animals, quai è lunsch ora avunda.
  • Attatgas sin animals da chasa ed animals da niz na vegnan betg toleradas, sco era betg che lufs s’avischinan ad abitadis, bains singuls e carstgauns. Là nua ch’i na dat nagina alternativa a mesiras per proteger muntaneras, vegnan quellas pajadas cun daners per la protecziun da l’ambient. Ils custs dals pertutgads vegnan pajads cumplainamain.
  • Igl è chaussa dals chantuns da realisar las mesiras en connex cun ils lufs. Quai è tuttina sco tar tut tschellas spezias d’animals.

Pretensiuns da funcziunan betg cun dretg vertent

Ina regulaziun pli rigurusa dals lufs e ch'il chantun survegnia tut las cumpetenzas da decider, sajan pretensiuns drizzadas al parlament federal. Il chantun possia actualmain far nagut cun il dretg vertent, quai ha ditg cusseglier guvernativ Mario Cavigelli. Tenor el giajan las pretensiuns dentant en la dretga direcziun. Er il chantun sco er la conferenza dals chantuns alpins lavurian en questa direcziun.

audio
Mario Cavigelli: «Pretensiuns van en buna direcziun - ma grev d'agir»
ord RTR Audio dals 03.05.2022. Bild: RTR
laschar ir. Durada: 21 Secundas.

Mario Cavigelli accentuescha denton ch'i na saja betg simpel da puspè vegnir cun talas pretensiuns, suenter ch'il pievel aveva refusà la revisun dalla lescha federala l'onn 2020. La posiziun dal parlament saja entant dentant sa midada ed el spera ch'ins sa cunvegni tar la proxima revisiun sin ina schliaziun che cuntenta tuts.

Set trieps en il Grischun

En il Grischun dal sid, il Grischun Central sco er en Surselva hai actualmain set trieps da lufs. Sper quels ha l'Uffizi da chatscha e pestga dal chantun registrà pèrins da lufs sco er lufs singuls. Quai tranter auter er en regiuns che n'han enfin uss nagins lufs, sco la Bregaglia ed il Puschlav.

Carta cun inditgà ils set trieps da lufs sin la carta grischuna.
Legenda: Actualmain hai set trieps da lufs en Grischun. Sper quel datti anc pèrins e singuls lufs. RTR

RTR novitads 11:00

Artitgels legids il pli savens

Scrollar a sanestra Scrollar a dretga