Ina mazlaria tradiziunala cun products tipics e spezials. La mazlaria Chiesa n'è betg mo stada ina purschida per ils purs per manar lur animals tar il mazler, mabain era ina buna reclama per l'entira Val Bergaglia. Ils products da Renato Chiesa èn enconuschents sur la val ora. La vegliadetgna da pensiun ha Renato Chiesa cuntanschì avant dus onns, ed sia dunna è era pensiunada. Uras da serrar las portas.
Anc na datti nagina successiun
Ils purs da la regiun han tschertgà ina soluziun. Sin maisa era l’idea da fundar ina «cooperaziun» – ma quell'idea ha fatg naufragi. Tenor il deputà en il Cussegl grond Maurizio Michael, duai la politica ussa daventar activa e fundar ina gruppaziun che va en tschertga dad ina soluziun per la Val Bregaglia. Il problem tenor Michael: I manchia persunas che han la voluntad da surprender il ristg da manar in tal affar.
Viadi da passa duas uras per ils animals
Per ils purs è quai pratic da manar lur animals tar la mazlaria. En paucas minutas èn els sin il lieu da maz. Ma a partir da l'avrigl ston els transportar las vatgas, chauras, nursas e portgs sur ils pass da Malögia e Güglia enfin a Cazas, u en l'Engiadina Bassa a Ramosch – in viadi da passa duas uras.
Dentant na datti nagina alternativa. En mintga cas, sch'i na dat betg ina miracla l'ultim mument ed insatgi s'annunzia sco mazler per la Bregaglia.