Differents indizis avevan mussà ch'il mastgel cun in pail beige fitg marcant pudess esser in luf ibrid. Las analisas dal Laboratori da biologia da conservaziun da l'Universitad da Losanna e dal Center Senckenberg per genetica d'animals selvadis conferman ch'i sa tracta d'in descendent d'ina cruschada da luf e chaun. La cumpart genetica da luf derivia da la populaziun da lufs alpina taliana - la derivanza exacta da l'animal n'è dentant betg clera, scriva il chantun. Probablamain saja quel dentant viandà da l'Italia dal Nord ed il Tessin en il Grischun.
I saja enconuschent ch'i dettia en l'Italia in u l'auter triep nua ch'igl ha dà cruschadas tranter chauns e lufs, ha ditg Arno Puorger da l'Uffizi da chatscha e pestga. Indizis per singulas cruschadas tranter chauns e lufs en Svizra haja in studì er gia cumprovà avant trais onns. Però saja quest luf ibrid il prim ch'ins haja sajettà ed er survegnì la cumprova genetica ch'i satractia d'ina cruschada. Tenor lescha da chatscha ston quests animals cruschads vegnir sajettads.
Lescha da chatscha prevesa eliminaziun d'ibrids
Ord vista da la protecziun da las spezias saja impurtant ch'ils animals ibrids vegnian sajettads, per ch'els na possian betg sa reproducir. Cas cuntrari pudess quai avair consequenzas negativas a lunga vista per la populaziun da lufs, uschia Arno Puorger da l'Uffizi da chatscha e pestga envers il schurnal regiunal da Radio SRF. Quai possia esser sco en quest cas che la cumparsa sa midia ma er ch'ils animals vegnian pli spert malsauns. La legislaziun federala da chatscha pretenda, ch'ibrids supponids ston vegnir sajettads da las autoritads chantunalas en cas da suspects motivads.
L'emprima giada vesì il luf ibrid hajan ins la fin da december 2021 a Domodossola, uschia il chantun.