I saja in problem pertutgant credibladad, crititgescha Markus Cadosch, secretari dal sindicat dal persunal da transport. In commember da direcziun da la Retica stoppia avair ina buna reputaziun. La finala tschentian ins era ad in emploià da vendita u ad ina maschinsta da la Retica la pretensiun ch’els hajan ina buna reputaziun. Tant pli valia quai per in commember da direcziun.
Co statti cun la credibladad?
Il delict aveva il commember da direcziun commess avant ch’el ha cumenzà il 2012 tar la Retica. La procedura giudiziala è dentant sa splegada pir l’onn passà. La dretgira ha sentenzià il commember da direcziun ad in chasti cundiziunà da 90 schurnadas à 120 francs ed ina multa da 2000 francs. I sa tracta pia d’in chasti miaivel. Markus Cadosch tschenta tuttina la dumonda da la credibladad. Tant pli che quest commember maina ina da las pli grondas ed impurtantas divisiuns da la Viafier retica.
Markus Cadosch ha survegnì bleras reacziuns dal persunal, cunzunt suenter che las gasettas avevan tematisà la procedura penala. I saja remartgabel che la viafier retica n’haja mai tematisà la chaussa visavi il persunal. «Sch’il directur da la Viafier retica ha anc adina la fidanza cumplaina en questa persuna, avess el stuì communitgar quai», di Markus Cadosch, secretari dal sindicat dal persunal da transport regiun ost.
Responsabel per eleger e survegliar la direcziun è il cussegl d’administraziun cun Stefan Engler sco president.
Admoniziun severa
Tant la direcziun sco era il cussegl d’administraziun hajan examinà la sentenzia, resguardà las circumstanzas e fatg in'audiziun cun il pertutgà, di Stefan Engler. Suenter hajan ins confermà unanimamain la confidenza a quest commember da direcziun. Ins haja però era exprimì ina admoniziun severa ed adattà ses contract da lavur.
La viafier retica è ina interpresa en possess dal chantun e da la Confederaziun. Tschenta ina tala interpresa betg pli autas pretensiuns al grad d’integritad d’ina persuna ch’occupeschan posts auts?
Gliez saja bain il cas, di Stefan Engler. Quai saja era la raschun ch’ins haja examinà en tutta seriusitad quest cas. Ins haja pasantà ils interess – era pertutgant la reputaziunda la Viafier retica. Resguardond la grevezza dal cas e ch’il delict saja sa splegà avant passa diesch onns, haja la direcziun agì uschia, di Stefan Engler.
«Ins dastga far ina giada in sbagl, ma in segund sbagl n’è betg pli perdunabel», di Stefan Engler, president dal cussegl d’administraziun da la Viafier retica.