5 grev blessads tar accident da tren a Solis

Ils 13 d'avust 2014 enturn mezdi hai dà in accident d'in tren da la Viafier Retica tranter Casti e Solis. 5 persunas èn sa blessadas grev, 6 lev. Ils blessads èn vegnids transportads en differents ospitals, ha communitgà la Polizia chantunala.

Il tren era da viadi direcziun Tusaun cura ch'el è collidà cun ina bova ch'era vegnida giuadora sin ils binaris; quai sin ina lunghezza da 15 meters. Sinaquai è il tren siglì ord las rodaglias.

140 passagiers

En il tren sa chattavan 140 persunas che vegnan evacuadas. Suenter l'evacuaziun èn ils passagiers vegnids tgirads da gidanters da la Rega e da las ambulanzas. En l'acziun gronda èn stads cumpigliads 60 pumpiers da l'entira regiun, 8 ambulanzas, 4 helicopters, 4 medis e la Polizia chantunala.

In ferm ruc

Tenor Federico Belotti, correspundent da RTR, hajan ils gidanters ed ils pumpiers prendì si tut las persunalias dals passagiers. Plinavant hajan plirs pertutgads raquintà, ch'i haja dà in ferm ruc cura ch'il tren saja charrà sin la bova. Dal sentiment anora na saja dentant betg stà uschè nausch.

Stefan Engler. Avrir maletg en lightbox.

Legenda da maletgs: Stefan Engler. ANR, F. Andry

«  Per cletg era in anghel pertgirader tranter ils passaschiers. »

Stefan Engler
president dal cussegl d'administraziun da la Viafier retica

«  Ina bova na pon ins betg impedir. »

Christian Wilhelm
Uffizi da guaud e privel

La situaziun en l'entir Grischun durant il mais zercladur saja stada fitg bletscha e bovas fissan cunquai pussaivlas en l'entir chantun, ha ditg Christian Wilhelm da l'uffizi da guaud e privels da la natira a RTR. I saja nunpussaivel da dir, nua che bovas possian ir a val. Ins stoppia reagir uschè bain sco pussaivel, suenter ch'i ha dà ina bova.