Siglir tar il cuntegn

Header

audio
Tge fa sch'ins è pertutgà?
Or da Actualitad dals 25.11.2021.
laschar ir. Durada: 03:05 minutas.
cuntegn

Violenza a chasa Per unfrendas datti differents posts da cussegliaziun

Violenza a chasa è tut la violenza che capita aifer la famiglia. Qua èn las pli differentas constellaziuns pussaivlas: violenza tranter fragliuns, da geniturs cunter uffants u – il pli savens – tranter um e dunna. Tge pon persunas pertutgadas far?

Violenza a chasa sa mussa en differentas furmas. Sper la violenza fisica, che sa mussa savens cun nodas blauas evidentas, datti er violenza psichica e violenza sexuala. Sarah Huder, coordinatura tar il post cunter violenza a chasa da l'uffizi dal servetsch social chantunal declera che violenza psichica sa mussia savens en pleds, per exempel en furma da smanatschas. Sut violenza sexuala tutgian tuttas acziuns sexualas che l'unfrenda na giavischa betg. Violenza a chasa è chastiabla e vegn persequitada d'uffizi.

Violenza a chasa en cifras

Avrir la box Serrar la box
  • Il 2020 hai dà en Grischun 254 delicts da violenza a chasa en Grischun.
  • En 85% dals cas da violenza en Grischun èn u eran unfrenda e delinquent en ina relaziun amurusa.
  • Dunnas èn pertutgadas pli savens da violenza a chasa. En 70% dals cas èn las unfrendas dunnas, en radund 30% dals cas umens, scriva l'Uffizi federal da statistica.
En in cas d'urgenza èsi il meglier da sa drizzar tar la polizia. Lezza po gidar e dar refugi da di e da notg.
Autur: Sarah Huder coordinatura post cunter violenza a chasa

Tgi che na veglia betg, na stoppia però betg ir tar la polizia. Uschia datti en Grischun differents posts che cusseglian unfrendas a moda confidenziala, per exempel il post spezialisà per l'agid a victimas u la chasa da dunnas. Il post da coordinaziun cunter violenza a chasa procura en il Grischun per ina collavuraziun interdisciplinara e professiunala.

Tar la cussegliaziun d'unfrendas na dettia nagina via da standard, quai saja da cas a cas auter. Impurtant saja da chattar ina schliaziun che correspunda er als giavischs da l'unfrenda. Cun agid da la polizia dettia er la pussaivladad che in um violent – u ina dunna violenta – na dastga betg pli turnar en la abitaziun communabla per duas emnas.

Remartgabel: Suenter in act da violenza na van betg tuts pèrins vias separadas. Uschia saja caracteristic che musters sa repetian: Suenter ina escalaziun da violenza suondia ina fasa da reconciliaziun, declera la dunna dal fatg.

Il pli impurtant è che unfrendas na sa sentan betg persulas.
Autur: Sarah Huder coordinatura post cunter violenza a chasa
Sarah Huder
Legenda: Sarah Huder Il post da coordinaziun cunter violenza a chasa procura en il chantun Grischun per ina collavuraziun interdisciplinara e professiunala en il sectur da la violenza a chasa. RTR / Yvonne Simmen

Er terzas persunas pon gidar

Tar posts da cussegliaziun e tar la polizia na possian betg be persunas ch'èn sezzas pertutgadas da violenza s'annunziar, mabain er confamigliars u vischins da unfrendas ch'observa violenza a chasa. Qua valia però la devisa da betg sa metter sez en privel. La finala accentuescha la coordinatura dal post da violenza a chasa ch'i saja impurtant da discurrer dal tabu e che unfrendas na dastgian mai sa sentir persulas.

RTR actualitad

Artitgels legids il pli savens

Scrollar a sanestra Scrollar a dretga