Siglir tar il cuntegn

Header

cuntegn

Votaziuns dals 13 da favrer Cussegl federal lantscha campagna per abolir taxa da bul

ueli maurer en la conferenza da medias
Legenda: Il cusseglier federal Ueli Maurer ha lantschà la campagna da votaziun per abolir la taxa da bul cun la votaziun dals 13 da favrer. Keystone
  • Il minister da finanzas Ueli Maurer ha lantschà la campagna da votaziun davart l'aboliziun da la taxa da bul.
  • La taxa da bul na frainia betg mo la branscha da finanzas, mabain era l'entira economia publica svizra. Quai argumentescha la maioritad burgaisa en il parlament.
  • Il Cussegl federal ed il parlament èn per in'aboliziun. La Partida socialdemocratica (PS), ils Verds ed ils sindicats han fatg in referendum encunter.
  • Ils 13 da favrer decida il suveran svizzer a l'urna.

Il Cussegl federal vul abolir in da las uschènumnadas taxas da bul. Numnadamain la taglia che fatschentas pajan, sch'ellas augmentan lur agen chapital per dapli che in milliun francs. Quella na duain ellas betg pli stuair pajar, sch'i va tenor il Cussegl federal ed il parlament. Da l'avis cuntrari èn la sanestra, ils Verds ed ils sindicats ed han perquai prendì il referendum.

Argument principal da Maurer – attractivitad da la Svizra per fatschentas

Cun la conferenza da medias dal mardi ha cusseglier federal Ueli Maurer lantschà il cumbat da votaziun. Ses argument principal per abolir la taglia ha da far cun la nova taglia minimala per interpresas. Quella vegn la Svizra ad introducir ensemen cun 135 auters pajais en il rom d'ina refurma fiscala da l'OECD (l'Organisaziun mundiala per svilup e collavuraziun economica).

Per bleras interpresas muntia quai ch'i stoppian pajar dapli taglia en l'avengir e quai po tenor il cusseglier federal avair per consequenza che la Svizra perda attractivitad sco lieu da domicil. Cunzunt lura sch'i vegnia anc vitiers ulteriuras taglias che n'existian betg en auters pajas, sco p. ex. la taxa da bul. Lura saja pussaivel che las fatschentas sa decidian per in auter lieu.

audio
Votaziuns 13-02-22: Cussegl federal ha lantschà il cumbat per abolir la taxa da bul
ord Actualitad dals 21.12.2021.
laschar ir. Durada: 3 minutas 36 Secundas.

Ch'i saja però impurtant d'esser attractiv per fatschentas, mussia in sguar sin il passà. Grazia a bunas cundiziuns, sajan bleras fatschentas sa chasadas en Svizra. Quai haja purtà novas plazzas da lavur ed autas entradas da taglia da fatschenta. Uschia hajan bunamain tut ils chantuns pudì sbassar las taglias per persunas privatas ils ultims onns. Perquai saja impurtant da restar attractiv per fatschentas ed ir vinavant questa via.

Taxa actuala ha plirs dischavantatgs

Tenor il directur da l'Uffizi federal da taglia ha la taxa actuala trais gronds dischavantatgs:

  1. Fatschentas giuvnas pateschian il pli fitg perquai che quellas stoppian per auzar l'agen chapital gia l'entschatta pajar ina taglia senza ch'ellas hajan pudì far reservas u gudogns ordavant.
  2. La taglia prendia simplamain davent daners d'ina fatschenta perquai ch'ella na saja betg colliada p. ex. cun il retgavu u cun il gudogn che quella fetschia. I giaja simplamain davent substanza.
  3. La taglia promovia il fatg che fatschentas piglian plitotst si credits, pia chapital ester che d'augmentar l'agen chapital. U ditg auter la taglia promova da far daivets enstagl da lavurar cun l'agen chapital schegea che l'agen chapital portia meglier il ristg da fatschenta che sche quel sto vegnir cuvert cun chapital ester. E che daivets pon esser in obstachel per il surviver da la fatschenta, saja sa mussà gist er en la crisa actuala.

Sperdita vegn cumpensada

Il minister da finanzas è era persvas che gia a media vista vegnian cumpensads ils 250 milliuns francs che la Confederaziun perda cun abolir la taglia sin nov agen chapital. Quai simplamain, perquai che la Svizra restia attractiva sco lieu per fatschentas ch'èn gronds pajataglias. I na saja betg uschia che persunas privatas stuessian lura pajar dapli taglia per cumpensar quai che las fatschentas na pajassen betg pli.

Da quest project votescha il pievel svizzer ils 13 da favrer.




Ord l'archiv:

audio
Il Cussegl dals chantuns vul abolir la taxa da bul
ord Echo der Zeit dals 02.06.2021.
laschar ir. Durada: 4 minutas 9 Secundas.

RTR novitads 11:00

Artitgels legids il pli savens

Scrollar a sanestra Scrollar a dretga