Siglir tar il cuntegn

Header

cuntegn

Votaziuns dals 26 da settember In fitg stretg Gea ed in cler Gea

L'emprima retschertga da gfs.berna mussa dus Geas per omaduas fatschentas che vegnan en votaziun ils 26 da settember . Questa enquista ha gfs.berna fatg sin incumbensa da la SRG SSR.

Sche la populaziun avess gia votà l'entschatta avust davart la lètg per tuts e l'iniziativa da 99%, fissan omaduas fatschentas vegnidas approvadas dal suveran svizzer.

  • La lètg per tuts fiss vegnida acceptada cun ina clera maioritad da 69%.
  • L'iniziativa da 99% fiss vegnida approvada fitg stretg cun 46% da las vuschs. 45% vessan vuschà cunter l'iniziativa e 9% èn anc indecis.

Cler Gea per la lètg per tuts

Gia trais quarts dals votants e da las votantas han ina clera opiniun davart il project – èn pia cler per u encunter la midada. Era sche la campagna principala cumenza pir. La probabilitad che las opiniuns sa midan anc è cunquai pitschna.

Be duas gruppas socialas avessan votà l'entschatta avust cunter la lètg per tuts: commembers e commembras da las baselgias independentas catolicas, e simpatisantas e simpatisants da la PPS.

Uschiglio sa mussa in consens sur tut las gruppas che din Gea a la lètg per tuts. Ord vista politica è l'approvaziun pli pitschna, da sanestra a dretg. Era tar la vegliadetgna sa sbassa il dumber da quels e quellas che din Gea, pli auta che la vegliadetgna è.

audio
Il trend per la votaziun «La lètg per tuts» mussa vers in Gea
05:51 min, Actualitad dals 20.08.2021.
laschar ir. Durada: 05:51 minutas.

Tar l'iniziativa da 99% è anc tut avert

Tar l'iniziativa da 99% na datti anc betg ina clera opiniun. Tenor partidas perda l'approvaziun per l'iniziativa, da sanestra a dretg. Il pli cler cunter èn simpatisants e simpatisantas da la PLD. Sper las partidas gioga era la situaziun finanziala ina rolla en la decisiun. Pli autas che las entradas èn, e pli bassa che l'approvaziun per l'iniziativa è. Normalmain chattan iniziativas da la sanestra dapli approvaziun tar la populaziun ord las citads. Tar l'iniziativa da 99% èsi per il mument dentant il cuntrari. L'approvaziun tar la glieud che viva en la champagna è pli gronda che tar quella che viva en las citads.

Cun la situaziun actuala èsi tenor ils auturs da la retschertga grev da prognostitgar, en tge direcziun ch'i pudess ir per l'iniziativa ils 26 da settember. La tendenza pudess dentant – sco tar bleras iniziativas ord posiziun da la minoritad, ir en direcziun da la posiziun dal Cussegl federal. En quai cas en direcziun dad in Na.

La retschertga

Avrir la box Serrar la box

L'institut gfs.berna ha fatg la retschertga per incumbensa da la SRG SSR. L'institut ha dumandà 22'427 votantas e votants tranter ils 2 d'avust ed ils 16 d'avust 2021. La quota da sbagl munta a +/- 2,8 puncts procentuals.

RTR novitads 06:00

Artitgels legids il pli savens

Scrollar a sanestra Scrollar a dretga