Siglir tar il cuntegn
Inhalt

Elecziuns A Cuira èn las partidas burgaisas sut squitsch

In di suenter las elecziuns a Cuira emprovan las partidas burgaisas da serrar las ritschas. Be lura pon ellas evitar ch’il socialdemocrat Patrik Degiacomi recaltga en il segund scrutini il terz sez en la suprastanza da Cuira, manegia il schefredactur RTR Gian Ramming.

Foto Gian Ramming ed in quote.
Legenda: Il schefredactur RTR Gian Ramming ristga ina prognosa. RTR

En sia valitaziun punctuescha Gian Ramming che la sanestra da Cuira saja abla da mobilisar e sustegnair in candidat. Quai saja gia sa mussà avant quatter onns tar l’elecziun da Doris Caviezel-Hidber.

«Il votant fa da patrun»

La dumengia han ils votants e las votantas da Cuira prendì decisiuns cuntradictoricas. D’ina vart han els reelegì cun fitg buns resultats ils dus suprastants da fin qua, Urs Marti e Tom Leibundgut. E da l’autra vart han els als scursanì las pajas.

Tenor il schefredactur RTR vulan votantas e votants che lur daners da taglia vegnian duvrads a moda spargnusa. Ed els s’orienteschian vi da lur atgnas pajas. E quai saja d’acceptar.