Cuira: Marti e Leibundgut reelegids - Terz sez en segund scrutin

Ils da Cuira han elegì la nova suprastanza, il Cussegl da la citad. Reelegids èn vegnids Urs Marti da la PLD e Tom Leibundgut da la glista libra. Uss discuteschan las partidas burgaisas il glindesdi, tgi ch'ellas vulan trametter en la cursa per quest sez ils 26 da zercladur.

Sursiglir cuntegn supplementar

Ils resultats

  • Urs Marti (PLD) 5'633 vuschs
  • Tom Leibundgut (Glista libra) 4'671 vuschs
  • Patrick Degiacomi (PS) 3'483 vuschs
  • Marco Tscholl (PBD) 2'139 vuschs
  • Hanspeter Hunger (PPS) 2'079 vuschs
  • Peter Portmann (PCD) 1'849 vuschs
  • Beath Nay (independent) 920 vuschs
  • Salome Mathys (PVL) 887 vuschs

Participaziun 40,36%

Otg candidats han cumbattì per trais sezs. Dentant be in era propi liber: Quel da Doris Caviezel-Hidber. Ils cussegliers da la citad vertents (dapi il 2012) Tom Leibundgut ed Urs Marti, il president da la citad, vulevan restar en uffizi ed han pudì nizzegiar il bonus dal 'fin da qua'.

Reeligì han ils da Cuira:

  • Urs Marti: 5'633 vuschs
  • Tom Leibundgut: 4'671 vuschs

Betg cuntaschì il pli absolut ha Patrik Degiacomi cun 3'483 vuschs.

Urs Marti è plinavant vegnì reelegì sco president da Cuira, quai cun 4'875 vuschs.

Segund scrutini

Nagin dals candidats per il terz sez ha survegnì la maioritad absoluta da 3'791 vuschs ch'è necessaria per l'elecziun sco cusseglier da la citad. Il pli datiers, suenter Patrik Degiacomi (308 vuschs memia pauc), è stà Marco Tscholl (PBD) cun 2'139 vuschs (ad el han mantgà 1'652 vuschs).

Reacziuns en las gasettas grischunas

Senza problems sajan Urs Marti e Tom Leibundgut vegnids reelegids a Cuira, quai scrivan las gasettas grischunas dal glindesdi.

Sch'il socialdemocrat Patrik Degiacomi vegnia elegì en il segund scrutini dependia, sch'ils burgais veglian impedir el u betg, uschia sa cloma il commentari da la «Südostschweiz».

Il «Bündner Tagblatt» scriva che Cuira tschertgia in «Budget-Stadrat», cunquai che la paja dals suprastants vegn reducida sin 200’000 francs ad onn.

RR novitads 17:00/06:00