La Valposchiavo decida davart nov center da sanadad

Tenor missiva per la votaziun a l’urna prevesess ins da metter trais organisaziuns sanitarias sut in tetg: l’Ospedale San Sisto, la Casa Anziani e la Spitex. Ils votants decidan als 5 da zercladur 2016.

Ospedale San Sisto a Poschiavo Bild in Lightbox öffnen.

Legenda da maletgs: Ospedale San Sisto a Poschiavo. mad

Tras la fusiun da l’ospital regiunal, la chasa per attempads e la Spitex duain ins pudair sfruttar meglier las sinergias tranter las diversas structuras. Quai surtut en il sectur da l’administraziun, tar l'acquisiziun da material ed er tar emploiar il persunal.

Agir avant da stuair reagir

Il nov center prevesa l’integraziun da tut ils servetschs ch’èn gia avant maun e d’unir l’Ospedale San Sisto e la Casa Anziani. En in segund pass è prevesida l’integraziun da la Spitex en l’organisaziun. Quai apaina che la nova fundaziun exista.

Cun questa reorganisaziun vul ins garantir e rinforzar la cuntinuitad da la purschida da sanadad en la regiun tenor las directivas dal chantun Grischun dal 2013.

Naginas plazzas van a perder

Il nov project duai surtut permetter da pudair controllar ils custs en l'avegnir. Sco ch’il vicepresident dal cussegl da fundaziun da l’ospital, Donato Fanconi, ha declerà na duessan vegnir stritgadas naginas plazzas da lavur cun ina fusiun da las organisaziuns ch’èn tuttas da chasa a Poschiavo.

Il suveran da las duas vischnancas da Brusio e Poschiavo decida davart il nov center sanitari a l’urna ils 5 da zercladur 2016.