Siglir tar il cuntegn

Votaziuns federalas «Sch'ins ha adina vacanzas, dovr'ins alura anc vacanzas?»

L'iniziativa per ina paja minimala senza cundiziuns n'ha quasi nagina schanza. Dentant ella è perfetga, per far patratgs davart ina nova furma da la societad - er da la societad grischuna. In experiment cun Ernst Wyrsch, president da hotelleriesuisse Grischun.

Persunas avant il bancomat: L'iniziativa per ina paja minimala senza cundiziuns vul dar a mintga burgais ina paja minimala, er sch'el na lavura betg.
Legenda: Paja senza lavur L'iniziativa per ina paja minimala senza cundiziuns vul dar a mintga burgais ina paja minimala, er sch'el na lavura betg. Keystone

Thomas Morus fa en ses roman «Utopia» da l'onn 2016 la proposta, da pajar a mintga Utopian ina paja per evitar enguladitschs. In'utopia è enfin uss er la proposta dals iniziants da l'iniziativa per ina paja minimala senza cundiziuns. 2500 francs per mintga burgais svizzer, independentamain sch'el lavura u betg, sch'el è ritg ubain pauper, sch'el è saun ubain malsaun.

Ed er Ernst Wyrsch, president da hotelleriesuisse Grischun na sa anc betg s'imaginar ina tala societad per il chantun Grischun. Dentant el sa lascha gugent en sin l'experiment da ponderar, tge che quai muntass per ina da las branschas las pli impurtantas dal chantun, l'hotellaria.

«Tanschan ils daners per far vacanzas»

Sco emprim sa tschenta el la dumonda, schebain il carstgaun dovria lura anc vacanzas, sch'el ha vacanzas quasi l'entir onn. Ed era, sch'ils daners bastian per far vacanzas. I po esser ina schanza, u lura betg.

In quint: Ina famiglia cun trais uffants survegniss per mintga creschì 2500 francs, e per mintga uffant 625 francs. Quai fiss total 6875 francs per mais. Per in na tanscha quai gnanc per viver, per in auter tanscha quai schizunt per far magari vacanzas.

portrait Ernst Wyrsch
Legenda: mad
Igl n'è insumma betg previsibel sco ch'il carstgaun sa cumporta en in tala situaziun.
Autur: Ernst Wyrschpresident da hotelleriesuisse Grischun

«Ils roboters train si letg»

Tge crai Wyrsch, dess quai insumma anc persunas che faschessan lavurs ch'è n'èn betg pajadas uschè bain en l'hotellaria, per exempel nettegiar chmbras? Tenor Wyrsch fiss ina pussaivladad da recrutar lura forzas da l'exteriur. El è dentant er persvadì ch'i na va betg pli ditg ed ils roboters fan da quellas lavurs.

Perquai che la digitalisaziun vegnia, er en l'hotellaria ed er en il Grischun. E lura vegnian ad ir a perder plazzas da lavur. Perquai saja senz'auter inditgà da far ponderaziuns dad in nov modell per la societad. Wyrsch è fitg avert per la discussiun, tuttina crai el, ch'il temp n'è anc betg qua: «L'iniziativa vegn memia baud. En tschintg ubain diesch onns fiss in meglier temp. Uss èn las consequenzas anc memia pauc previsiblas.»