«Foss da rösti» tar la refurma da las rentas

Entant che ils patruns da la Svizra tudestga èn cunter la refurma, èn ils patruns da la Svizra franzosa per la refurma da las rentas 2020. Il medem sa mussa tar ils sindicats: Sindicats romands èn cunter la refurma – Ils sindicats da la Svizra tudestga per.

Igl è adina puspè dad vesair differenzas tranter la Svizra tudestga e la Svizra franzosa. L'uschènumnà «foss da rösti» sa mussa surtut tar votaziuns.

Tar la refurma da las rentas è il foss vesibel tar ils sindicats e tar las organisaziuns dals patruns. Intant che patruns da la Svizra tudestga èn cunter la refurma da las rentas, èn ils patruns da la Svizra franzosa per.

Tenor Christoph Reymond, il president dal Centre Patronal da las patrunas ed ils patruns da la Svizra franzosa, datti la differenza, perquai che la Svizra franzosa saja pli modesta. Ils «Romands» fetschian era la politica pli reala.

Christophe Reymond Avrir maletg en lightbox.

Legenda da maletgs: Christophe Reymond di gea a la refurma da las rentas. Keystone

«  Jau pens che nus Romands essan pli modests che noss collegas tudestgs. »

Christophe Reymond
Centre Patronal

Reymond na crai betg ch'il parlament chatta ina meglra soluziun che questa. Tenor el ha la refurma era ina schanza tar las votantas ed ils votants. Perquai pledescha el per in gea a l’urna.

Tals sindicats è la situaziun sutsura. Divers sindicats da la Svizra franzosa èn cunter la refurma, entant che quels da la Svizra tudestga èn per. Per Alessandro Pelizzari, il vicepresident dals sindicats da Genevra, èsi cler che auzar la vegliadetgna da las dunnas sin 65 onns e da sbassar la tariffa da conversiun na va betg. Da quel avis sajan era ils collegas da la Svizra tudestga. Mo che la differenza saja, che ils sindicats da la Svizra tudestga èn pronts dad ir en cumpromiss. Ils Romands betg.

«  Different è che sindicats da la Svizra tudestga din ch'i na vegn betg dapli bonus dal parlament. Quai è auter tar sindicats en la Svizra franzosa. »

Alessandro Pelizzari
Vicepresident dal l'uniun dals sindicats genevra

Uschia ch'ils sindicats romands cumbattan ensemen cun las patrunas ed ils patruns da la Svizra tudestga, ed ils patruns e las patrunas romandas cumbattan ensemen cun ils sindicats tudestgs.

RR novitads 06:00