Refurma da rentas 2020 - e las dunnas?

Ellas duain lavurar in onn pli ditg - numnadamain enfin 65 onns. Las dunnas. Gist ellas èn pertutgadas directamain da la refurma da las rentas 2020 che va en votaziun ils 24 da settember. I dat opiniuns pro e contra.

5 dunnas pli veglias sesan sin in banc Bild in Lightbox öffnen.

Legenda da maletgs: Tge dian las dunnas da la refurma da rentas, ellas stuessan lavurar fin 65 onns. Keystone

La votaziun federala davart la refurma da las rentas 2020 fatschentia las dunnas en il Grischun. Quai conferman pliras organisaziuns da dunnas.

Lavurar 1 onn pli ditg

Surtut la pretensiun che las dunnas stoppian lavurar enfin 65 onns dettia da discutar, di Cathrin Räber. Gist per dunnas che vegnissan pensiunadas proximamain saja quai in grond tema. I dettia dentant bleras che sajan simplamain era ledas che las rentas vegnian segiradas a lunga vista cun la refurma e ch'era dunnas cun entradas pli pitschnas possian profitar.

«  Dunnas giuvnas fan valair ch'ellas stoppian pajar anc dapli. »

Cathrin Räber
Presidenta Centrala da dunnas GR

Ina tscherta critica auda Cathrin Räber da la generaziun giuvna: Bleras hajan l'impressiun che la giuventetgna na possia insumma betg profitar da la refurma da las rentas - mabain stoppia be pajar.

Tema e speranza

I saja fitg grev da dir sche las dunnas sajan plitost per u cunter la refurma da las rentas 2020, di la presidenta da las puras grischunas, Astrid Derungs. Ina pura lavuria uschè u uschia sin il manaschi puril - independent sche la vegliadetgna da pensiun vegnia auzà sin 65 onns.

«  Avair 70 francs dapli sa esser decisiv per ina pura. »

Astrid Derungs
Presidenta da las puras GR

Gist per las puras che n'hajan nagina cassa da pensiun, saja impurtant d'avair ils 70 francs dapli renta dad AVS mintga mais, che la refurma empermetta per tut las persunas che van da nov en pensiun.

Cathrin Räber sco era Astrid Derungs èn persvadidas che la discussiun aifer las dunnas cuntinuescha anc enfin la votaziun dals 24 da settember.

RR actualitad 07.00