Trend da votaziun – i vegn stretg per la refurma da rentas

La segunda retschertga da l’institut gfs.bern mussa ina tendenza negativa per la finanziaziun da l’AVS e la refurma da las rentas 2020. Per il project da votaziun «Segirezza alimentara» vesi però ora bain.

Trend finanziaziun da l'AVS Avrir maletg en lightbox.

Legenda da maletgs: La retschertga da gfs.bern mussa che la finanziaziun da l'AVS vegn gist sin 50%. RTR, Grafica

Sch'i fiss vegnì votà l'entschatta settember davart ils projects da votaziun, avessan 50% dals dumandads ditg «gea» al conclus federal davart la finanziaziun da l’AVS, 45% avessan ditg «na». A la lescha davart la refurma da rentas 2020 schessan 51% «gea» e 44% «na». Anc betg decidì co votar davart quels dus projects han 5%. La retschertga mussa pia in fitg stretg «gea». Il trend mussa dentant en l'autra direcziun.

Trend negativ

Grafica refurma da rentas 2020 Avrir maletg en lightbox.

Legenda da maletgs: La retschertga da gfs.bern mussa che la refurma da las rentas vegn sin 51%. RTR, Grafica

Tar omadus projects en connex cun la refurma da rentas datti ina pitschna maioritad persuenter. Il trend è dentant levamain negativ, quai scriva l'institut. Sch'il trend cuntinueschia uschia enfin tar il di da votaziun, saja ina midada da la maioritad pussaivla. Pervia da las relaziuns fitg stretgas è il resultat dals 24 da settember avert.

Segirezza alimentara: tgunsch «gea»

Survista da tuts 3 projects da votaziun Avrir maletg en lightbox.

Legenda da maletgs: Per la refurma da rentas vegni stretg. In «gea» sa mussa tar la segirezza alimentara. RTR, Grafica

Mez settember avessan 69% dals votants e da las votantas ditg «gea» u «plitost gea» al conclus federal davart la segirezza alimentara. 20% fissan stads cunter la segirezza alimentara, ed 11% èn anc indecis. Cumpareglià cun il barometer da votaziun da l'avust è tant la cumpart da quels ch'èn per il project sco era la cumpart da quels ch'èn cunter creschida.

Laschar ir video «Segund trend da votaziuns»

Segund trend da votaziuns

1:32 min, Telesguard dals 13.9.2017

RR novitads 06:00