Siglir tar il cuntegn

2018/03/04 Al puls da las votaziuns

Resultats, reacziuns, analisas – davant e davos las culissas …

Resultats, rapports e reacziuns: Cun il Liveticker da RTR essas al current.

Il ticker è a fin

  • 18:20

    Quai fiss stà da nus per vus...

    Engraziel per l'attenziun ed ina bella saira.

    PS: reacziuns, resuns e critica gugent trametter a multimedia@rtr.ch

    Salids en il num da l'entir team online da RTR, Gion Gieri Flepp

    Gion Gieri Flepp che ri en la camera
    Legenda: Suenter nov uras Liveticker... RTR, Flavio Bundi
  • 18:12

    Ed anc intginas reacziuns grischunas...

    ... da la Lia Rumantscha

    «In di legraivel per il Grischun» titulescha la Lia Rumantscha e prenda «enconuschientschas cun plaschair» da la decisiun clera en Grischun. Il resultat valiteschia ella surtut sco «expressiun da solidaritad tranter las regiuns linguisticas».

    Da refusar l'iniziativa garanteschia betg l'ultim l'existenza da RTR sco «pitga impurtanta per la preschientscha, la derasaziun ed il mantegniment» dal rumantsch, fa a savair la Lia en ina communicaziun a las medias.

    ... da la cultura grischuna

    Il resultat cler mussia, ch'il engaschi cunter quest'iniziativa «radicala ed en plirs aspects absurda» haja sa rendì, commentescha Andy Kollegger, il president da l'Uniun chantunala da musica dal Grischun e organisatur da la manifestaziun da cultura «NA a No Billag» per las medias. El saja tant cuntent sco er surlevgià dal resultat da la votaziun.

    Tut ils rapports, resultats e reacziuns da la dumengia da votaziuns chattais qua.

    grafica votaziuns naziunalas
    Legenda: In GEA ed in NA sin livel naziunal. RTR
  • 17:56

    Il Telesguard da votaziuns

    Cun reacziuns da Jan Koch (aderent da l'iniziativa No Billag), Stefan Engler (adversari da l'iniziativa No Billag), Ladina Heimgartner (directura da RTR) e Hanspeter Leubrument (editur da la Somedia).

    Legende: Video Telesguard da votaziuns dals 04.03.2018 abspielen. Laufzeit 17:00 Minuten.
    Or da Telesguard dals 04.03.2018.
  • 17:51

    Dad Arosa fin Zernez...

    èsi vegnì votà ed elegì oz. Betg mo davart l'iniziativa No Billag ed il nov urden da finanzas 2021.

    • Arosa ha p. ex. approvà la revisiun parziala da la planisaziun locala per explotar e deponer dapli material a Valmischein – quai cun 847 cunter 68 vuschs.
    • Trun ha approvà la revisiun parziala da la planisaziun locala cun 404 cunter 45 vuschs. Quella pertutga tranter auter ina nova enzonaziun en il territori Ferrera per pussibilitar ina pratica da fisioterapia.
    • Ubain: Bravuogn Filisur ha elegì Erwin Caviezel en la cumissiun da l'ovra electrica cun 259 vuschs.

    La survista da tut las votaziuns ed elecziuns en 20 vischnancas datti qua.

    grafica cun vopnas da diversas vischnancas grischunas
    Legenda: 20 vischnancas grischunas han er anc votà u elegì sin livel communal. Grafica RTR
  • 17:22

    Telesguard da votaziuns cun Jan Koch e Stefan Engler

    • a las 17:35 sin SRF 1
    • er a pled vegnan Ladina Heimgartner, directura RTR e Hanspeter Lebrument, editur da la Somedia
    sguard en il studio dal Telesguard
    Legenda: La moderatura Corina Schmed è pronta. RTR, Flavio Bundi
  • 17:10

    Commentari da Flavio Bundi: In Na a l’individualissem – in Gea a la cuminanza

    La fin finala èsi in fitg cler resultat. Suenter in cumbat da votaziun lung e stentus e per part era fitg emoziunal èn las votantas ed ils votants s’exprimì en favur da medias independentas en Svizra.

    Per il schefredactur da RTR, Flavio Bundi è tranter auter er il cler na grischun in segn ed in'obligaziun per mantegnair ina ferma plazza da medias en il chantun triling.

    Legende: Audio Il commentari da Flavio Bundi, schefredactur da RTR abspielen.
    1:30 min, Actualitad dals 04.03.2018.
  • 17:00

    Era RTR vegn a metter il focus sin infurmaziun e cultura

    Quant che RTR sto spargnar en il rom dal pachet da spargn da la SSR na possian ins il mument anc betg dir, uschia Ladina Heimgartner, la directura da RTR.

    Legende: Audio No Billag: Co vinavant tar RTR? abspielen.
    4:06 min, Actualitad dals 04.03.2018.
  • 16:43

    SRG – Ina nov'entschatta cun in pachet da spargn da 100 milliuns francs

    Suenter il na a l'iniziativa No Billag empermetta la SRG SSR refurmas. Il resultat saja legraivel, cunzunt er perquai ch'el è vegnì confermà en tuttas regiuns linguisticas. I saja dentant er ina conferma che obligheschia.

    • Il pachet da spargn da 100 milliuns francs saja necessari perquai che las taxas vegnan reducidas sin 365 francs ad onn ed las entradas da la SSR èn danovamain plafonadas.
    • La SSR duai daventar pli effizienta tar l'administraziun, tar l'infrastructura e tar la tecnica.
    • La mesadad da las entradas duai vegnir duvrada per l'infurmaziun.
    • Las unitads da la SSR sa concentreschan en l'avegnir sin lur mandat da basa. Quai cun stritgar las reclamas durant films pli lungs per sa differenziar da televisiuns privatas. Er na duai betg pli dar purschidas en la rait senza video u audio sin las paginas d'infurmaziun da SRF, RTS e RSI.
    • Dapli pais duai però survegnir la collavuraziun cun medias privatas. Tranter auter cun metter a disposiziun material d'archiv.
    • L'SSR duai mussar la Svizra en si'entira variaziun. Perquai vegn l'engaschament tar producziuns indigenas en la sparta films e serias augmentà.
    il bajetg da la SSR a Berna
    Legenda: Il cler na a l'iniziativa No Billag oblighescha er la SRG SSR da sa refurmar. mad / SSR
  • 15:41

    L'interess dad autras medias è grond en chasa RTR

    Per ina giada n'èsi betg mo da far program da radio, televisiun ed online ma er da sez dar pled e fatg ad autras medias.

    La directura da RTR, Ladina Heimgartner dat pled e fatg.
    Legenda: La directura da RTR, Ladina Heimgartner dat pled e fatg. RTR, Flavio Bundi
  • 15:33

    Grond levgiament er tar la Somedia

    Silvio Lebrument, il mainafatschenta da la sparta medias è cunzunt levgià ma er surprais dal cler na grischun a l'iniziativa No Billag.

    Legende: Audio «Nus pudain cuntinuar» – Silvio Lebrument, Somedia abspielen.
    3:18 min, Actualitad dals 04.03.2018.
  • 15:24

    «In grond crap è crudà giu dal cor»

    A Ladina Heimgartner, directura dad RTR è crudà in grond crap giu dal cor cun il a NA a No Billag. Ma i saja er in cumenzament per la SRG.

  • 15:07

    Er l'adherent da No Billag Olivier Kessler vesa il positiv

    Gia il fatg ch'il pievel haja pudì votar davart questa dumonda saja bun.

    Legende: Audio Reacziun dad Olivier Kessler abspielen.
    0:12 min, Novitads dals 04.03.2018.
  • 14:54

    Martin Candinas è cuntent

    Il cusseglier naziunal è s'engascha fermamain cunter l'iniziativa No Billag.

    Legende: Audio Reacziun da Martin Candinas abspielen.
    0:15 min, Novitads dals 04.03.2018.
  • 14:29

    No Billag è gia la 5avla votaziun en connex cun la SRG

    • 14-06-2015: Votaziun davart la nova lescha da radio e televisiun (50,1% gea cunter 49,9% na)
    • 2011 e 2013: Duas votaziuns per abolir la SRG fan naufragi gia avant che vegnir en votaziun
    • 2011: Il parlament di na a la petiziun per sbassar las taxas da radio e televisiun sin 200 francs.
    • 1994: L'iniziativa «Trumpf-Buur» per abolir la SRG na survegn betg avunda suttascripziuns
    • 1982: L'iniziativa «libertad ed independenza da radio e televisiun» na cuntanscha betg las suttascripziuns necessarias.
  • 14:05

    Cuira creescha basa per sviluppar implants da sport Obere Au

    Cuira approva revisiun parziala da l'urden fundamental per sviluppar enavant ils implants da sport Obere Au e per pussibilitar ina halla d'events, quai cun 9'937 cunter 1'743 vuschs.

    La survista da tut las elecziuns e votaziuns communalas datti qua.

    Vopna da Cuira
    Legenda: Vopna da Cuira Grafica RTR
  • 14:01

    Naziunal: In cler GEA al nov urden da finanzas...

    Quai mussa la terza calculaziun approximativa da gfs Berna: 83% gea cunter 17% na.

  • 13:55

    Naziunal: No Billag fa naufragi

    La maioritad dals chantuns ha ditg na. Per reussir avessi duvrà la maioritad da las vuschs e la maioritad dals chantuns.

    • Tenor l'ultima calculaziun approximativa dian 71% na e 29% gea a l'iniziativa No Billag.
  • 13:35

    Fatschas rientas tar ils adversaris da l'iniziativa No Billag a Berna

    Fatschas rientas tar ils adversaris da l'iniziativa No Billag a Berna.
    Legenda: Ils adversaris da l'iniziativa No Billag a Berna èn levgiads. RTR, Fabia Caduff
  • 13:26

    NA a No Billag – il Grischun tut cotschen...

    Il GR tut cotschen.
    Legenda: Il GR tut cotschen. RTR
  • 13:20

    Grischun: 77,1% NA a No Billag

    Quai è il resultat final dal Grischun. Nagina da las 108 vischnancas han ditg gea. La directura da RTR Ladina Heimgartner è levgiada.