Siglir tar il cuntegn

2018/03/04 Clera maioritad schess «na» a la No Billag

Avessan ils Svizzers gia gì da decider ils 12 da schaner davart ils projects da votaziun dals 4 da mars, vessi dà in cler «na» a l’iniziativa No Billag ed in cler «gea» al «nov urden da finanzas 2021». Quai resulta da l'emprim barometer da l’institut gfs.berna en incumbensa da la SRG SSR.

Legende: Video Retschertga gfs: La Svizra avess ditg na a No Billag, gea ad urden da finanzas abspielen. Laufzeit 1:26 Minuten.
Or da Telesguard dals 26.01.2018.

Curt e concis

  • iniziativa No Billag vegniss refusada cun 60% encunter 38% (indecis: 2%)
  • nov urden da finanzas 2021 vegniss acceptà cun 69% encunter 16% (indecis: 15%)
60% refusassan la No Billag, 38% schessan gea.
Legenda: RTR Grafica

Il mument schessan 38% dals dumandads «gea» a la No Billag, 60% fissan cunter l’iniziativa che vul abolir las taxas da radio e televisiun. Ils adversaris da l'iniziativa cumenzan uschia il cumbat da votaziun cun in avantatg da 22%.

Las persunas che vulan ir a votar quintan che quella vegnia refusada, quai però be piz a cup.

En Svizra latina è il «na» il pli cler

La polarisaziun tenor partidas politicas è gronda. La simpatia per l’iniziativa è bassa tar la sanestra, crescha vers la dretga - survegn però pir ina maioritad en il conturn da la partida populara. En Svizra latina è il «na» a l’iniziativa il pli cler: en Svizra franzosa schessan 67% «na» a l’iniziativa, en la Svizra taliana fissan quai 65%.

«Generaziun Netflix» schess «gea»

Entaifer las vegliadetgnas sa mussa in cler foss. Entant ch’ils giuvenils tranter 18 e 30 sustegnan l’iniziativa (51% gea / plitost gea) refusan las pesunas sur 30 onns quella. Tenor ils auturs dal studi è questa tendenza surtut da declerar cun la nova orientaziun da medias, che vegn surtut observada tar ils giuvenils - la generaziun «Netflix».

Plinavant tendeschan persunas cun entradas fitg bassas u fitg autas plitost da dir «gea» a la No Billag.

Legende: Video Vuschs ed arguments da la discussiun da podi abspielen. Laufzeit 3:41 Minuten.
Or da Telesguard dals 26.01.2018.

Iniziativa No Billag

Tge vul l'iniziativa: La Confederaziun na duai betg pli dastgar incassar taxas per radio e televisiun. Plinavant na duai ella betg sustegnair finanzialmain emetturs da radio u televisiun ed er betg avair agens emetturs.

Aderents sceptics - adversaris cuntents

Ils aderents da l'iniziativa reageschan cun critica e sceptica sin ils resultats da la retschertga. Christian Riesen (co-iniziant) puntuescha ch'i na saja betg da prender memia seriuas talas retschertgas. Valair valia il resultat da la dumengia da votaziun. Jan Koch (schef da fracziun PPS en Cussegl grond) attribuescha quai a la pussanza da las medias che cumbattian l'iniziativa.

Apparentamain hajan bleras persunas ussa realisà che l'iniziativa saja in pachet malrecli, di Andrea Masüger (CEO Somedia). Pli datiers ch'il termin vegnia, e pli realistic ch'il pievel vesia la situaziun. Pli precauta sa dat la cussegliera federala Doris Leuthard. Ella saja sceptica vers resultats che midian uschè fitg. La finala speria ella che la glieud legia il text, s'infurmeschia e decidia suenter.

Cler sustegn per «nov urden da finanzas»

Il mument sustegnessan cun 69% dapli che dus terzs il «nov urden da finanzas 2021», 16% fissan encunter. Ils aderents cumenzan cunquai il cumbat da votaziun cun in avantatg confortabel da 53%.

Il "nov urden da finanzas" vegniss il mument approvà cleramain cun 69% encunter 16%.
Legenda: RTR Grafica

Sco quai ch’il sustegn sur tut las partidas en il parlament lai supponer, sa mussa er in cler muster tar la populaziun. Tut las sutgruppas ch’èn vegnidas intercuridas approvassan il mument il «nov urden da finanzas». Opposiziun u sceptica datti sulet tar las persunas che simpatiseschan cun la partida populara.

Opposiziun è pitschna

Guardà sur las regiuns dessi il mument il pli grond consentiment da la Svizra tudestga cun 71%, da la Svizra taliana il pli pitschen cun 55%. En Svizra franzosa sustegnan 62% la nova ordinaziun da finanzas.

Tenor ils auturs dal studi è in «gea» fitg probabel damai che l’opposiziun è flaivla.

Nov urden da finanzas

Tge vul la nova ordinaziun: La Confederaziun duai er pudair incassar la taglia sin la plivalur e la taglia federala directa suenter il 2020. Perquai sto vegnir midà la constituziun.

Ils 12 da schaner fissan 53% dals dumandads segir ids a l’urna. Tenor ils auturs dal studi, in'auta cumpart avant la votaziun. Per l'emprima retschertga represchentativa ha l'institut gfs.berna dumandà 1'201 persunas cun dretg da votar, quai tranter ils 8 ed ils 18 da schaner 2018.

RR novitads 06:00