Siglir tar il cuntegn

2018/03/04 PLD grischuna di «na» a No Billag

Il resultat è stà cler: Cun 77 cunter 14 vuschs refusa la PLD dal Grischun l'iniziativa No Billag. Quai han delegadas e delegads decidì a lur radunanza a Cuira.

Il maletg mussa delegadas e delegads durant la votaziun davart No Billag
Legenda: La votaziun tar la PLD è stada clera: Na a No Billag. Nadja Cadonau

La radunanza da delegads suonda uschia la proposta da la suprastanza da la partida, ch'aveva proponì in «na». Era la PLD Svizra ha gia piglià posiziun e refusa l'iniziativa che va en votaziun ils 4 da mars.

In «na» – era per motivs economics

Gist sco grischunas e grischuns stoppian ins dir «na» a l'iniziativa No Billag, di il president da la PLD, Bruno Claus. Il Grischun cun sias trais linguas dovria medias independentas che rapportian da tut las valladas. Bruno Claus argumentescha dentant era ord vista economica: Il Grischun saja memia pitschen per che interpresas privatas possian porscher emetturs da radio e televisiun.

Ch'ils liberals, che pretendan savens dad esser la partida da l'economia, han cunquai in'autra opiniun ch'ils mastergnants, na fa nagins quitads a Bruno Claus. El haja l'impressiun che l'Uniun da d'artisanadi e mastergn na saja insumma betg unida en questa dumonda. Ed insumma: La PLD dal Grischun saja adina puspè d'in auter avis che l'Uniun d'artisanadi e mastergn dal Grischun.

6 giadas «na» ed 1 giada «gea»

La PLD è l'ultima partida che ha prendí posiziun tar l'iniziativa che vul abolir las taxas da radio e televisiun. Be la PPS dal Grischun di «gea», tut tschellas partidas (PS, La Verda, PCD, PBD, PVL e PLD) refusan No Billag.

Cler sustegn per Nov urden da finanzas 2021

Senza grondas discussiuns han delegadas e delegads prendì posiziun davart l'autra votaziun federala dals 4 da mars: La PLD è unanimamain per in GEA al Nov urden da finanzas 2021.

Las parolas da las partidas chantunalas e naziunalas tar las votaziuns dals 4 da mars 2018.
Legenda: Las parolas da las partidas chantunalas e naziunalas tar las votaziuns dals 4 da mars 2018. Grafica RTR

RR actualitad 21:00