Siglir tar il cuntegn
Inhalt

Votaziuns federalas Sustegn per nov urden da finanzas è creschì

Sch'i fiss vegnì votà gia ils 11 da favrer avessan 74% da las votantas e dals votants ditg gea u plitost gea davart il nov urden da finanzas. Quai èn 5% dapli che anc tar l'ultima enquista il schaner.

Visualisaziun dal resultat da l'enquista: 46% segir gea, 28% plitost gea, 9% segir na, 7% plitost na.
Legenda: Trend da gfs.berna dals 07.-14.02.2018 Quota da sbagl èn 2,7% (n=914) RTR

Gia tar l'emprima enquista da gfs.berna per la SRG SSR il schaner avessan 69% dals dumandads approvà il nov urden da finanzas. Uss è l'avantatg anc creschì per ulteriurs 5% sin 74%. Cun 16% che din na u plitost na èn ils adversaris restads stabils. 10% dals dumandads èn anc adina indecis.

Il trend dals dumandads per l'enquista va en la medema direcziun sco tar il parlament. La gronda part schess gea al nov urden da finanzas. Il sustegn per il nov urden da finanzas è bain pli ferm tar las partidas da mez e sanester che dretg, dentant chatta ella ina maioritad sur tuttas partidas. Sulet en la Partida populara svizra èn ils adversaris cun 30% stabils. Il trend va dentant tar tuttas gruppas en direcziun gea.

Er tenor regiuns linguisticas in «gea»

En tuttas trais regiuns linguisticas cumpigliadas va il trend en direcziun gea. Il pli ferm sustegn survegn l'urden cun 81% or dal Tessin. Il pli pauc sustegn vegn da la Svizra franzosa cun 68%. La Svizra tudestga avess votà cun 75% per l'urden da finanzas.

Segunda enquista

Segunda unda da l'enquista da la SRG SSR davart las votaziuns dals 4 da mars 2018 da l'institut da perscrutaziun gfs.bern. Realisà tranter ils 7 ed ils 14 da favrer 2018, tar 1'400 persunas cun dretg da votar, elegidas a moda represchentativa.

RR novitads 06:00