Siglir tar il cuntegn

2018/06/10 Scuol dat 3,4 milliuns per in batschigl tar la Clozza

Cun in cler gea ha approvà la vischnanca da Scuol il credit per sa proteger cunter aua gronda tar la Clozza. Era cler gea di la populaziun da Scuol a la lescha communala davart abitaziuns secundaras.

Purtret dal material ch'è vegnì or da la val Clozza en direcziun Scuol.
Legenda: Il fanadur 2015 aveva la val purtà ina massa buglia. MAD, J.A Taisch

Betg ina da las 3 votaziuns a Scuol è stada dispittaivla. Tuttas trais èn approvadas cun trais quarts da las vuschs ubain dapli. Il project per sa proteger cunter auas grondas è approvà il pli cler cun 88,62% gea, quai tar ina participaziun da 37%.

Il project Clozza prevesa in grond batschigl da tschiffada che retegna 12'000 meters cubic material. Dasper quai duai dar per lung da la Clozza mirs ed indrizs da protecziun. Dals custs totals da 3,4 milliuns francs surpiglian chantun e Confederaziun 55%.

Lescha communala davart segundas abitaziuns

Cun 75,18% gea approva Scuol la lescha communala davart las abitaziuns secundaras. Quai tar ina participaziun da 36%. La lescha communala vegn adattada a la federala. Quella lubescha a hotels ch'existevan gia avant il 2012 (avant la votaziun davart abitaziuns secundaras), che han gia 25 onns e che na pon betg vegnir manads a moda rentabla, da midar 50% da las chombras en abitaziuns secundars.

Gea era a las zonas d'hotels a Tarasp e Scuol

Sumegliont cler cun 78,16% di la populaziun da Scuol gea a las zonas d'hotels a Tarasp e Scuol. Qua cun ina participaziun da 36%. Uschia pon vegnir realisads plirs projects: abitaziuns gestiunadas en l'hotel Schweizerhof a Tarasp, en la zona d'hotels a Scuol ed en la zona da fabrica Nairs a Scuol.

RR novitads 13:00