Siglir tar il cuntegn

2018/06/10 Segunda enquista mussa in Gea a la lescha davart gieus per daners

Sch'i fiss stà da votar ils 20 da matg, lura fiss la lescha davart ils gieus per daners vegnida approvada da las votantas e dals votants svizzers, quai cun ina maioritad da 58%. L'iniziativa per il daner cumplain avess il pievel svizzer però refusà cun 54%. Quai mussa la segunda enquista da trend.

La segunda retschertga da gfs.bern mussa in trend in gea a la lescha davart gieus per daners ed in na na a l'iniziativa per il daner cumplain.
Legenda: La segunda retschertga da gfs.bern mussa in trend ad in Gea a la lescha davart gieus per daners ed in Na a l'iniziativa per il daner cumplain. RTR

Las intenziuns da votar èn tar omaduas fatschentas idas en direcziun da la posiziun dal Cussegl federal e dal parlament.

Lescha davart gieus per daners

58% da las votantas e dals votants èn il mument segir u plitost per approvar la lescha davart ils gieus per daners. Tar l'emprima enquista da trend levan 52% approvar la lescha. 37% dals dumandads èn cunter la lescha e 5% èn anc indecis.

En Svizra tudestga prenda la sceptica envers la lescha davart gieus per daners giu. En cumparegliaziun cun l'emprima enquista èn uss dapli persunas per la lescha. Era en las regiuns ruralas s'augmenta il consentiment. L'enquista da la Societad svizra da retschertgas socialas (GfS) mussa, ch'i dat in tschert conflict da generaziuns. Cunzunt persunas tranter 18 e 29 onns èn cunter la lescha. Persunas pli veglias èn plitost persuenter. Era persunas ch'èn independentas d'ina partida paran da dir Gea a la lescha.

58% da las votantas ed ils votants èn segir u plitost per la lescha davart gieus per daners.
Legenda: 58% da las votantas e dals votants èn segir u plitost per la lescha davart gieus per daners. RTR

L'iniziativa per il daner cumplain

La segunda enquista da trend mussa la furmaziun d'opiniun negativa envers l'iniziativa per il daner cumplain. 54% da las votantas e dals votants avessan trais emnas avant la votaziun ditg Na u plitost Na a l'iniziativa. 34% din Gea u plitost Gea. En cumparegliaziun cun l'emprima enquista è la cumpart da Na creschida per 6%. Il GfS fa quint che l'iniziativa vegn refusada cleramain.

Las pli grondas differenzas sa mussan tar las intenziuns da votar da las partidas. Uschia vegn l'iniziativa sustegnida da la sanestra. Las partidas amez e da la dretga sco er persunas independentas da partida refusan dentant l'iniziativa. Tenor ils experts dal Gfs saja remartgabel, ch'er circuls critics envers la regenza voteschian uss plitost Na – quai cuntrari a l'emprima enquista da trend. Plinavant saja per ils 10 da zercladur 2018 mo in scenari pussaivel, numnadamain che l'iniziativa giaja da l'aua giu.

54% da las votantas ed ils votants èn segir u plitost cunter l'iniziativa per daner cumplain.
Legenda: 54% da las votantas e dals votants èn segir u plitost cunter l'iniziativa per il daner cumplain. RTR

Per tge vai insumma?

Gieus da daners: Cun la nova lescha èn casinos online da l'exteriur bloccads en Svizra.

Daner cumplain: Tgi duai avair la pussanza da noss daners? Duai quai da nov esser mo la Banca naziunala svizra (BNS) u sco fin uss la BNS e las bancas privatas?

Enquista dal GfS sin incumbensa da la SRG SSR

L’enquista ha la Societad svizra da retschertgas socialas praticas (GfS) fatg sin incumbensa da la SRG SSR. Per l’enquista han ins dumandà 1'411 votants represchentativs, quai tranter ils 15 e 23 da matg 2018. La quota d’errur è tar +/- 2,7%, quai tar ina probabilitad da 95%. Plinavant fan ils auturs da l'enquista attent, che quels resultats mussan la situaziun mumentana da 15 enfin 20 dis avant la votaziun federala.

RR novitads 06:00