Siglir tar il cuntegn

Votaziun chantunala Englais en scola primara er en il futur?

A Mustér èn tant ils scolars da la sisavla classa sco era il scolast da classa Gion Tenner persvas da l'instrucziun d'englais gia en la scola primara. Ma i dat era scolasts ch'èn main cuntents d'introducir la lingua gia sin stgalim primar.

Trais linguas ston ils scolars emprender sin il stgalim primar. Per els na saja quai dentant nagin problem. Uschia tuni almain en la stanza da scola da Gion Tenner a Mustér. Ils scolars da la sisavla classa èn fitg motivads dad emprender ina segunda lingua estra gia en primara.

Era il scolast da classa è persvadì

Englais en scola primara è ina buna chaussa. Tenor mia opiniun na porta l'englais nagins dischavantatgs.
Autur: Gion Tennerscolast primar da Mustér

Cunzunt per ils Rumantschs saja l'englais fitg impurtant. Era possia la lingua englaisa esser in agid per la lingua rumantscha, cunquai che grevs pleds sajan medems u sumegliants.

I dat dentant era vuschs criticas da magisters

Betg tut vid l'emprender englais sin il stgalim primar saja dentant positiv. Uschia han intgins scolasts crititgà differents puncts. Per exempel saja il med d'instrucziun betg structurà bain. Da l'autra vart hajan lecziuns da roms pratics sco zambregiar u scola da lavur stuì vegnir stritgadas. Ed per scolars cun difficultads dad emprender linguas saja i pretendì bler, d'emprender duas linguas estras gia sin livel da scola primara.

RR actualitad 08:00