Siglir tar il cuntegn
cuntegn

Votaziuns communalas Decisiuns en vischnancas grischunas

Ils resultats da las votaziuns ed elecziuns communalas.

  • Vopna da San Murezzan
    Legenda: San Murezzan RTR

    San Murezzan

    A San Murezzan dovri in segund scrutini per eleger il president communal. Suenter l'emprim scrutini ha Christian Jenny survegnì 824 vuschs e manchentà be per 5 vuschs il pli absolut. Il president actual Sigi Asprion 809 vuschs. Ils 7 d'october datti uschia ina segunda elecziun. Plinavant di San Murezzan GEA al credit da 2,9 milliuns francs per il museum Segantini ed al credit da 1,2 milliuns francs per remplazzar la sutgera Suvretta-Randolins.

  • Vopna da Poschiavo
    Legenda: Poschiavo RTR

    Poschiavo

    Il podestà Alessandro Della Vedova (PCD) n'è betg pli vegnì reeelgì. Nov president communal da Poschiavo è Giovanni Jochum (PLD). El è vegnì elegì cun 1041 vuschs, Alessandro Della Vedova ha survegnì 622.

  • Vopna da Tavau
    Legenda: Tavau RTR

    Tavau

    Il suveran da Tavau è s’exprimì per in credit annual dad 1,25 milliuns francs per il Forum mundial d'economia. Quai è la cumpart che la vischnanca sto pajar vid ils custs da segirtad per il WEF. Per l'elecziun en suprastanza communala dovri in segund scrutini, nagin dals candidats ha cuntanschì la maioritad absoluta. En il parlament è vegnida elegida Ladina Alioth (PS). Ultra da quai vegnan las fracziuns parzialmain abolidas, la lescha da santeri è vegnida approvada ed in GEA hai era dà ad ina garanzia per ils indrizs d'ennevar al Rinerhorn.

  • Vopna da Scuol
    Legenda: Scuol RTR

    Scuol

    A Scuol resta Christian Fanzun il president communal. El ha survegnì 857 da 946 vuschs valaivlas. Er elegids en suprastanza communala èn Reto Barbüda, Fadri Blanke, Fadri Häfner, Andrea Matossi, Aita Zanetti-Stalvies e Daniel Stecher.

  • Vopna da Zernez
    Legenda: Zernez RTR

    Zernez

    A Zernez ha la populaziun reelegì Emil Müller sco president communal. Cun 305 vuschs ha el surpassà cleramain il pli absolut da 183 vuschs. Vitiers ha il suveran da Zernez approvà la revisiun parziala da la planisaziun locala uschia ch'il project chasa da scola è cun quai er approvà.

  • Vopna da Landquart
    Legenda: Landquart RTR

    Landquart

    La nova halla da sport traidubla survegn glisch verda: Landquart accepta il credit da 15 milliuns francs cun 1347 GEA e 529 NA.

  • Vopna da Domat
    Legenda: Domat RTR

    Domat

    Votantas e votants han acceptà omaduas revisiuns per la planisaziun locala. Quella per pudair modernisar la staziun, ils binaris ed il sutpassadi cun 1278 cunter 307 vuschs. Quella che pertutga midadas da zona per differents territoris, per exempel per l'indriz da pumptrack a Padrusa, l'anteriura deponia Vallada, la Val Parghera ubain la scolina Caguils cun 1253 cunter 243.

  • Vopna da Trimmis
    Legenda: Trimmis RTR

    Trimmis

    Roman Hug (PPS) resta president communal da Trimmis. Elegids en la suprastanza èn Christian Kindschi, Reto Dünser, Cecilia Manetsch-Derungs e Bettina Hartmann-Joos.

  • Vopna da Tumleastga
    Legenda: Tumleastga RTR

    Tumleastga

    Il suveran ha reelegì Werner Natter sco president communal. A la suprastanza fan part Ursula Tscharner, Pius Giger, Peter Lehmann ed Ursula Hämmerle. Suenter l'emprima legislatura da quatter onns da la vischnanca fusiunada vegn la suprastanza reducida da 7 sin 5 persunas. Cunquai che duas persunas han demissiunà, avevi tuttina bleras candidaturas sco posts.

  • Vopna da Roveredo
    Legenda: Roveredo RTR

    Roveredo

    Roveredo venda terren a la firma Alfred Müller SA. Cun 702 cunter 538 vuschs ha il suveran ditg GEA da vender trais parcellas cun ina surfatscha totala da bunamain 10milli meters quadrat per 2,3 milliuns francs a l'interpresa d'immobiglias.

  • Vopna da Samedan
    Legenda: Samedan RTR

    Samedan

    Ils Samedrins han concedì cleramain in credit da 4,3 milliuns francs per il provediment d'aua Val Champagna.

  • Vopna da Zezras
    Legenda: Zezras RTR

    Zezras

    Il suveran ha approvà il plan da zonas per la chasa da tgira Casa Fiora ed ils custs per la tecnica d'infurmaziun e communicaziun da la scola da Zezras.

  • Vopna da Claustra
    Legenda: Claustra RTR

    Claustra

    Ils da Claustra approveschan cun 1016 a 234 vuschs il quint communal 2017, che mussa in surpli d'entradas da bun 109'000 francs. 43,21% da las burgaisas ed ils burgais eran a l'urna.

  • Vopna da Lumnezia
    Legenda: Lumnezia RTR

    Lumnezia

    La vischnanca ha approvà la lescha davart l’urden public. Quella garantescha la segirtad en vischnanca. Ella regla tranter auter era il rumir naiv, ils dis da ruaus, fieus artifizials ed il diever da dronas.

  • Vopna da Stussavgia
    Legenda: Stussavgia RTR

    Stussavgia

    En Stussavgia è Barbara Schneider Zinsli vegnida elegida en suprastanza communala.

  • Vopna da Favugn
    Legenda: Favugn RTR

    Favugn

    A Favugn datti ina nova plazza per l'administraziun dals fatgs da bajegiar. Quai ha decis il suveran cun gronda maioritad. Uschia duai il schef da bajegiar survegnir sustegn. Igl è previs in pensum da 60-80% e custs supplementars da 65'000 francs ad onn.

  • Vopna da Valragn
    Legenda: Valragn RTR

    Valragn

    La vischnanca Valragn ha elegì las quatter persunas ch’eran sa messas a disposiziun en il cussegl communal: Renato Mengelt, Georg Trepp-Ulber, Martin Hosig e Monika Lorez-Meuli. Per la nova vischnaunca fusiunada Valragn (Hinterrhein, Nufenen e Spligia) che va en vigur ils 01-01-2019 è quai stà l’emprima elecziun. Il president communal Christian Simmen-Schumacher era gia vegnì elegì.

  • Vopna da Mesocco
    Legenda: Mesocco RTR

    Mesocco

    4xGEA sin livel communal – ils da Mesocco han di gea a a las revisiuns da la planisaziun locala da S.Bernardino (260:94) e da Mesocco e Pian San Giacomo 269:77). Mesocco conceda 1,2 milliuns francs per rempars dal flum Ri del Bés (312:58) e vul reveder il mandat da prestaziun da l’associaziun da Spitex dal Moesano, la ACAM (302:50). La participaziun a las votaziuns communalas era tar radund 41%.