Siglir tar il cuntegn
Inhalt

Votaziuns 25-11-2018 Decisiuns en vischnancas grischunas

Ina survista da votaziuns ed elecziuns en las vischnancas dal Grischun. La glista vegn actualisada permanentamain...

  • Vopna da Claustra
    Legenda: Claustra RTR

    Claustra

    Las pendicularas Claustra-Madrisa vulan realisar in ressort da famiglia «Ober Ganda» a Claustra-Vitg. Perquai vul la vischnanca reveder la planisaziun locala e lubir in contract cun dretg da construcziun. En il ressort è planisà in hotel cun 156 letgs, 78 abitaziuns da vacanzas, in’ustaria e parcadis. Il suveran votescha era davart abolir la «Lex Koller» communala e davart il preventiv e pe da taglia per l'onn 2019.

  • Vopna da Cuira
    Legenda: Cuira RTR

    Cuira

    Votantas e votants da Cuira decidan ina giada dapli davart ils indrizs da sport «Obere Au». Quella giada vai per in credit da 44 milliuns francs per il project «Eisball» – che vul concentrar las purschidas da ballape e hockey sin l’areal «Obere Au». Plinavant decidan ils da Cuira sche la vischnanca da Maladers duai vegnir integrada en la citad. Votantas e votants da Maladers han gia approvà l’incorporaziun a la radunanza communala.

  • Vopna da Tavau
    Legenda: Tavau RTR

    Tavau

    Il suveran da Tavau sto deliberar in credit da bun 20 milliuns francs per modernisar il center dal vitg, meglier ditg la plazza «Arkaden» sin la promenada. Igl è previs da stgaffir ord ils parcadis ina nova plazza publica, modernisar il kino, sanar il center da sport, remplazzar la halla existenta cun ina halla traidubla, schlargiar la via da scola e stgaffir parcadis aifer il bajetg da la GKB. L’entir project vul Tavau realisar en 6 etappas. Plinavant ha Tavau dad eleger in commember per la suprastanza (2. scrutini), adattar la concessiun per il Lai da Tavau e reveder la planisaziun locala «Palüda».

  • Vopna da Panaduz
    Legenda: Panaduz RTR

    Panaduz

    La vischnanca decida davart in credit da 18 milliuns francs per bajegiar ina nova halla polivalenta. Quella duai cumpigliar ina halla da gimnastica dubla ed ulteriuras localitads per scola e scolina. La nova halla sin l’areal da scola «Ruver» duai esser finida la fin dal 2020.

  • Vopna da Domat
    Legenda: Domat RTR

    Domat

    Domat vul realisar in nov sutpassadi «Gassa surò» datiers da la staziun. Votantas e votants decidan davart in credit da 7,5 milliuns francs. Uschia vulan ins manar il traffic sut ils binaris ora e schliar las barrieras da la viafier. Votantas e votants han era da decider davart il preventiv ed il pe da taglia per l'onn 2019 e davart in credit per sanar la baselgia Sogn Gion.

  • Vopna da Glion
    Legenda: Glion RTR

    Glion

    La vischnanca da Glion decida davart in credit da bun 7,6 milliuns francs per renovar l’areal dals autos da posta sin la staziun. Suenter che la Viafier retica ha renovà la staziun ed ils binaris, vul la vischnanca realisar a partir da l’onn proxim in areal per ils autos da posta, plazs da parcar ed ina nova zona da peduns sin la staziun.

  • Vopna da Val
    Legenda: Val RTR

    Val

    La vischnanca da Val decida davart pliras cumponentas co sanar las pendicularas. I va per introducir ina nova taxa d’alloschament, ina taxa per promover il turissem e per auzar la taglia sin immobiglias. Questas entradas plus ina contribuziun da la vischnanca furman la summa da 900’000 francs che la vischnanca vul pajar mintg’onn a las pendicularas. Persuenter pon ils giasts ir gratuitamain cun la cabina si Gadastatt.

  • Vopna dad Arosa
    Legenda: Arosa RTR

    Arosa

    La vischnanca dad Arosa duai sa participar cun 6 milliuns francs ad ina nova organisaziun tetgala per il provediment da sanadad. Quel duai cumpigliar il center da seniors, la spitex, il center medicinal ed il servetsch da salvament sut in tetg e cunquai spargnar custs. La vischnanca vul surlaschar a la nova organisaziun differentas immobiglias e participaziuns en la valita da 6 milliuns francs.

  • Vopna da Flem
    Legenda: Flem RTR

    Flem

    Tranter Flem e Laax duai dar ina nova via per peduns e velocipedists. Ils custs totals muntan ad 1,25 milliuns francs – la vischnanca da Flem sto la finala surpigliar 570’000 francs. La nova via per peduns e velocipedists maina davent da la Via Prau la Selva enfin tar il parcadi Staderas.

  • Vopna da Zernez
    Legenda: Zernez RTR

    Zernez

    Zernez sto anc occupar dus posts en suprastanza communala, damai che be 4 persunas eran vegnidas elegidas en l’emprim scrutini. Per il segund scrutini è enconuschent actualmain in candidat: Riet Denoth.

  • Vopna da Mustér
    Legenda: Mustér RTR

    Mustér

    Mustér sto cumplettar sia suprastanza communala. Sco sulet candidat è enconuschent actualmain Wendelin Jacomet da Mumpé Medel. El vul remplazzar Iso Mazzetta che sa retira la fin da l’onn.

  • Vopna dad Alvra
    Legenda: Alvra RTR

    Alvra

    La vischnanca d'Alvra elegia sia suprastanza communala. Dus da sis suprastants han demissiunà. Sco president communal è Daniel Albertin gia vegnì re-elegì la fin d'october per in'ulteriura perioda d'uffizi.

  • Vopna da Samignun
    Legenda: Samignun RTR

    Samignun

    Samignun sto anc occupar in post en suprastanza communala. En l'emprim scrutini la fin d'october era vegnì elegì Cla Davaz – las ulteriuras persunas n'han betg cuntanschì la maioritad absoluta. Sco president communal è gia confermà Walter Zegg.

RTR votaziuns 25-11-2018