Siglir tar il cuntegn
Inhalt

Votaziuns 25-11-2018 Duas iniziativas «Buna scola grischuna»

Ils iniziants pretendan ch’il Cussegl grond haja il pled final cura ch’i va per decisiuns che pertutgan la scola – e betg la regenza.

Il maletg mussa satgados da scolars.
Legenda: Tgi decida tge che scolaras e scolars emprendan en scola? Keystone

Il suveran grischun ha da decider davart duas iniziativas. Savens vegn era discurrì dad in’iniziativa dubla, damai che omadus projects han finamiras sumegliantas. Quellas ha in comité da persunas privatas inoltrà ils 15 da mars 2017.

Project 1: «Cundecider en dumondas impurtantas da la furmaziun»

En l’avegnir duai il Cussegl grond relaschar ina lescha ubain in conclus sch’i va per dumondas impurtantas davart la furmaziun. Quel duai vegnir suttamess al referendum facultativ, quai vul dir: Tgi che n’è betg cuntent cun la decisiun po rimnar 1'500 suttascripziuns e cunquai cuntanscher ina votaziun a l’urna. Quai vulan ils iniziants francar en la constituziun grischuna.

Arguments PRO & CONTRA

Personen-Box aufklappenPersonen-Box zuklappen

Ils iniziants èn da l'avis che la furmaziun saja il fundament per la democrazia e perquai stoppia il pievel avair la responsabladad lasura. Gia dapi in temp dettia in svilup sbaglià en las scolas: En il focus sajan pli e pli fitg ils interess da l’economia globala enstagl dal svilup persunal dals uffants cun ina furmaziun che s’orienteschia era vid la cultura grischuna.

La regenza ed il Cussegl grond refusan l’iniziativa e vulan restar tar il sistem actual. Plinavant sajan dumondas impurtantas davart la furmaziun regladas en la lescha da scola. Quella possia il Cussegl grond adina puspè reveder e là saja era in referendum facultativ pussaivel.

Project 2: «Cundecider tar ils plans d’instrucziun»

Entant ch’i va tar l’emprima iniziativa plitost per dumondas da furmaziun generalas, tracta la segunda iniziativa explicit il plan d’instrucziun. La finamira è dentant la medema: Betg la regenza, mabain il Cussegl grond duai decider davart plans d’instrucziun. Ed era qua duai vegnir fixà in referendum facultativ per ch’il pievel haja la pussaivladad da votar a l’urna. Questa segunda iniziativa po dentant vegnir realisada mo sche l’emprima iniziativa vegn approvada.

Arguments PRO & CONTRA

Personen-Box aufklappenPersonen-Box zuklappen

Cun il plan d’instrucziun 21, ch’è vegnì introducì en il Grischun sin l’onn da scola actual, na saja il sistem da scola betg pli concepì tenor cuntegns e finamiras, mabain tenor cumpetenzas teoreticas che scolastas e scolasts stoppian definir. Tenor ils iniziants è l’instrucziun uschia fitg dependenta da la magistraglia e cunquai casuala.

La regenza ed il Cussegl grond refusan era questa segunda iniziativa. La scola na duai betg esser suttamessa a las lunas politicas e perquai duain era vinavant experts definir las finamiras. Plinavant unifitgeschia il plan d’instrucziun 21 la scolaziun en l’entira Svizra ed i na fetschia nagin senn ch’il Grischun haja ses agen.

RTR votaziuns ed elecziuns