Siglir tar il cuntegn
Inhalt

Votaziuns 25-11-2018 Iniziativa davart vatgas cun corna

Ils iniziants enturn il pur Armin Capaul vulessan dapli vatgas e chauras cun corna. La Confederaziun duai perquai sustegnair ils purs cun ina contribuziun finanziala. Il Cussegl federal ed il parlament refusan l'iniziativa.

Il maletg mussa ina vatga cun corna
Legenda: Dapli vatgas cun corna – quai è la finamira dals iniziants. Keystone

Ina contribuziun finanziala duai animar dapli purs en Svizra da tegnair vatgas e chauras cun corna. En quest senn vul ina gruppa da persunas privatas midar la Constituziun federala ed ha inoltrà l'iniziativa il mars 2016 cun bunamain 120'000 suttascripziuns.

En il parlament federal è vegnì discutà davart ina cuntra-proposta a l'iniziativa – la finala èsi dentant vegnì decidì da refusar l'iniziativa senza cuntraproposta. Il pur Armin Capaul aveva signalisà da retrair sia iniziativa sut tschertas cundiziuns.

Arguments PRO & CONTRA

Personen-Box aufklappenPersonen-Box zuklappen

Ils iniziants na vulan betg scumandar da far giu la corna ad animals giuvens, mabain animar ils purs da desister sin questa intervenziun massiva tar ils animals. Ad els saja dentant era conscient, che animals cun corna custian dapli als purs, cunquai ch'i dovra dapli plaz e stallas pli grondas. Perquai duai la Confederaziun pajar contribuziuns – quant precis duai la Confederaziun decider.

Per il Cussegl federal ed il parlament è l'iniziativa cunter-productiva: Cun tals impuls finanzials possia capitar ch'ils purs bajegian puspè stallas per rentar ils animals e quai fiss mender per ils animals che da far giu la corna. Plinavant saja il ristg per accidents pli grond tar animals cun corna.

Ils iniziants pretendan ina contribuziun da 190 francs ad onn per vatga e 38 francs per chaura. In agid finanzial duain dentant be quels purs survegnir che laschan en il liber lur animals durant 26 dis il mais la stad e 13 dis il mais l'enviern. En total fissan quai custs supplementars da 15 milliuns francs ad onn.

Il Cussegl federal quinta cun custs tranter 10 e 30 milliuns francs ad onn - tut tenor co che l'iniziativa vegn realisada. La regenza fa dentant attent ch'i pudess persuenter dar pli paucas contribuziuns en auters secturs agrars.

RR Votaziuns dals 25-11-2018