Siglir tar il cuntegn
cuntegn

Votaziuns 25-11-2018 Iniziativa davart vatgas cun corna perda maioritad

L'iniziativa davart vatgas cun corna na vess betg survegnì entschatta november ina maioritad a l'urna. Cleramain refusada fiss vegnida l’iniziativa per l’autodeterminaziun. Perencunter avessan Svizras e Svizzers acceptà la lescha per survegliar assicurads socials.

Grafica davart las iniziativas dal november
Legenda: GRAFICA RTR

Quai mussa il segund trend da votaziun che l'institut gfs.berna ha fatg en l'incumbensa da SRG SSR.

Trend per in NA a l’iniziativa davart las vatgas cun corna

Il cumenzament da november avessan ditg 49% gea a l'iniziativa, e cun quai n'avess quella betg chattà ina maioritad tar la populaziun.

Percunter han ils adversaris da l'iniziativa gudagnà sustegn, quel munta suenter la segunda retschertga a 46%. Per ils 25 da november stima gfs.berna actualmain cun ina refusa stgarsa da var 52%.

Grafica davart l'iniziativa davart las vatgas cun corna
Legenda: GRAFICA RTR

NA a l’iniziativa per l'autodeterminaziun resta

L’iniziativa che vul metter il dretg svizzer sur il dretg internaziunal vegniss il mument refusada cun 61%.

Sco tar l'emprima enquista è la polarisaziun aifer las partidas era anc uss considerabla: Entant ch’ils electurs da la PPS èn cleramain per l’iniziativa, èn ils electurs da tut las ulteriuras partidas per gronda part encunter.

Grafica davart l'iniziativa per autodeterminaziun
Legenda: GRAFICA RTR

GEA a la lescha per survegliar assicurads socials

Il mument èn 59% da la populaziun svizra per acceptar la midada da la lescha federala da l’assicuranza sociala.

L'argument il pli pesant sin la vart dals aderents è, che la surveglianza vegnia reglamentada cleramain sin basa constituziunala. E quai possia era proteger assicurads socials.

Grafica davart la lescha per survegliar assicurads socials
Legenda: GRAFICA RTR

Factur d'intschertezza munta tar tuttas cifras a maximalmain ±2.7 puncts procentuals.

RR actualitad 06:00