Siglir tar il cuntegn
Inhalt

Votaziuns 25-11-2018 Iniziativa per l'autodeterminaziun

La Partida populara Svizra pretenda cun si'iniziativa che la Constituziun federala haja precedenza avant ils contracts internaziunals. Il Cussegl federal ed il parlament cusseglian da dir Na a l'iniziativa.

Il maletg mussa il bajetg dal Tribunal federal a Losanna.
Legenda: Tgi decida en cas da dispita? Keystone

L'iniziativa per l'autodeterminaziun vul schliar il conflict tranter la Constituziun federala ed ils contracts internaziunals che la Svizra ha fatg. Sch'ina iniziativa approvada dal pievel cuntrafa per exempel ad in contract internaziunal, duai la Constituziun federala cun il text da l'iniziativa valair - cun excepziun dal dretg sfurzant sco per exempel il scumond da sclavaria e da tortura.

Datti in tal conflict stuess vegnir negozià in nov contract cun ils stadis pertutgads. Sche quai na gartegiass betg stuess il contract vegnir desditg.

Arguments PRO & CONTRA

Personen-Box aufklappenPersonen-Box zuklappen

Ils iniziants argumenteschan che la politica haja l'ultim temp adina puspè realisà be per part u insumma betg iniziativas approvadas dal pievel. Quai cun l'argumentaziun ch'ellas cuntrafetschian al dretg internaziunal. Cun metter la Constituziun federala sur il dretg internaziunal vegniss rinforzada la democrazia directa e cun quai era l'autodeterminaziun (Selbstbestimmung).

Il Cussegl federal ed il parlament cusseglian da dir na a l'iniziativa: Ella mettess en privel la segirezza e la stabilitad per la populaziun e l'economia en Svizra. Per midar contracts dovria adina er il consentiment dal partenari ed uschia fiss la Svizra dependenta da la bainvulientscha dad auters stadis. Insumma fetschia la Svizra tals contracts internaziunals en agen interess (p.ex. tar contracts davart commerzi cun rauba, la protecziun da bains culturals u la collavuraziun da la polizia).

Il Cussegl federal fa attent che la Svizra stuess contractar da nov tut ils contracts pertutgads ubain desdir il contract sche necessari. In tal mecanissem fix saja in dischavantatg. La Svizra veglia pudair decider sezza tge contracts far ed era cura desdir quels.

RR Votaziuns dals 25-11-2018