Siglir tar il cuntegn
cuntegn

Votaziuns 25-11-2018 «Las vatgas cun corna n'èn betg tschertgadas»

Il giuven pur da 29 onns lascha far davent la corna da las vatgas. Per ses manaschi na fissian vatgas cun corna betg adattadas. RTR ha fatg ina visita durant ch'il veterinari ha fatg giu la corna a quatter vadels.

Legenda: Guardar il video L’iniziativa davart las vatgas cun corna divida ils purs. Durada 02:57 minutas.
Or da Telesguard dals 13.11.2018.

Las 30 vatgas da mulscher da Roman Niederberger n'han tuttas nagina corna. Per il giuven pur èsi cler, che vatgas cun corna fissan betg adattadas per in tal manaschi. Ed era sin la fiera sajan las vatgas cun corna main tschertgadas che quellas senza corna.

Brischar davent la corna

Il veterinari Markus Zinsli vegn sperasvi tar Roman Niederberger per brischar davent la corna da quatter vadels. Sco emprim survegnan ils vadels ina sedaziun, uschia ch'els dorman e na percorschan nagut. Diesch minutas pli tard dat il veterinari lura ina anestesia locala tar mintga corna. Anc ina giada diesch minutas suenter po Markus Zinsli brischar davent il cumenzament da la corna, quai cun in fier fitg chaud.

Duront il barschar giu la corna senta il vadi nuot.
Autur: Markus Zinsliveterinari

Suenter la procedura hajan els dentant in zic mal. Perquai squitta el a la fin in medicament cunter il mal.

Cunter l'iniziativa

Per Roman Niederberger èsi cler, ch'el di Na a la «Iniziativa davart las vatgas cun corna». El è da l'opiniun che mintga pur duai decider sez, sch'el vul tegnair vatgas cun corna u senza. Tenor el na tutgia quai era betg francà en la constituziun.

RR actualitad 07:00