Siglir tar il cuntegn
Inhalt

Votaziuns 25-11-2018 Lescha per survegliar assicurads socials

Per eruir sch'ina persuna ha il dretg sin sustegn social duain «observaziuns zuppadas» esser lubidas. Enten midar la lescha less il Cussegl federal lubir uschenumnads dedectivs socials. In comité ha dentant prendì il referendum e perquai datti ils 25 da november ina votaziun en chaussa.

In detectiv fa fotografias zuppadas ord in auto.
Legenda: Cun midar la lescha duai esser pussaivel en tscherts cas d'observar a moda zuppada persunas assicuradas. Keystone

Observar persunas a moda zuppada duai dentant esser pussaivel mo sch'i dat indizis concrets ch'ina persuna retira illegalmain prestaziuns socialas. Lubidas èn registraziuns da maletgs e da tun sche la persuna è en in lieu nua ch'ella po vegnir observada senz'auter (sin via, en ina butia, sin balcun). In sguard en la stiva u en chombra da durmir n'è dentant betg lubì. Suenter l'observaziun sto la persuna pertutgada vegnir infurmada e po sa defender davant dretgira.

Cunter questa midada da lescha ha in comité da persunas privatas lantschà il referendum, quai cun l'argument ch'i dettia in suspect general per l'entira populaziun e ch'i vegnia cuntrafatg a la sfera privata. Sche la midada da la lescha vegn refusada resta quai tar il status quo ed observaziuns zuppadas n'èn betg pussaivlas.

Arguments PRO & CONTRA

Personen-Box aufklappenPersonen-Box zuklappen

Las assicuranzas socialas sustegnan persunas ch'èn dependentas da prestaziuns. Per ch'ellas possian sclerir senza dubi ils dretgs, stoppian ellas en paucs cas far observaziuns zuppadas, quai ils arguments dal Cussegl federal e parlament. Ils artitgels d'observaziun fixeschian ils cunfins ch'èn necessaris per quai e protegian ils dretgs da las persunas pertutgadas.

Per il comité da referendum van las midadas memia lunsch. Las assicuranzas socialas survegnian memia blera libertad, ellas violeschian la sfera privata da las persunas assicuradas. Plinavant na vegnian ils meds tecnics per las observaziuns strusch limitads.

Detectivs socials duain pudair observar e survegliar persunas che retiran ina renta d'invaliditad e vegnan suspectadas da far maldiever da l'assicuranza – tranter auter cun sondas da GPS.

Surveglianza en il Grischun

Tenor la statistica da l'Assicuranza d'invalids (AI) han il 2017 radund 4'700 persunas retratg ina renta dad AI en Grischun. Sco quai che Thomas Pfiffner, manader da l'Uffizi da l'AI, ha declerà envers RTR, ha l'uffizi laschà examinar durant il 2017 41 cas pervi da suspect da fraud ubain abus d'assicuranzas – tranter auter er cun agid da detectivs socials. Tranter quels cas eran schebain persunas che retiravan gia ina renta sco er da quellas che avevan dumandà per ina renta. En 14 da quels 41 cas è il suspect vegnì confermà. Per consequenza èn rentas vegnidas sistidas, reducidas ubain refusadas.

RR Votaziuns dals 25-11-2018