Siglir tar il cuntegn
Inhalt

Votaziuns 25-11-2018 PBD GR di Na a «Buna scola grischuna»

Plinavant dian ils burgaisdemocrats grischuns Na a l’iniziativa d’autodeterminaziun ed in Gea a la lescha per survegliar assicurads socials.

en ina stanza, delegadas e delegads da la partida PBD voteschan
Legenda: A Maiavilla han las delegadas ed ils delegads da la PBD decidì las parolas per ils 25.11.2018 RTR, Gion Gieri Flepp

Cun nagina cuntravusch han ils delegads e las delegadas decis a lur radunanza a Maiavilla la parola Na a l’iniziativa dubla «Buna scola grischuna». Quella pretenda ina giada il dretg da pudair cundecider davart dumondas impurtantas da la furmaziun e da l’autra vart la pussaivladad da cundecider tar plans d’instrucziun. Divers delegads sco er il president Beno Niggli èn da l’avis che la scola dovria uss ruaus e ch’ins stoppia plitost adattar en il pitschen il nov plan d’instrucziun uss introducì che da sbittar quel cun las iniziativas.

Cun 62 tar 2 vuschs er cleramain Na han ils delegads ditg a l’iniziativa d’autodeterminaziun da la Partida populara svizra che vul metter il dretg svizzer sur il dretg internaziunal. Els han laschà persvader dals arguments da lur cusseglier naziunal Duri Campell che ha tranter auter menziunà che l’iniziativa portia malsegirtad giuridica e che la Svizra perdess la credibilitad sco partenari da commerzi.

La parola Gea han ils delegads e las delegadas decis a la lescha per survegliar assicurads socials. Quella permettess che detectivs pudessan observar persunas assicuradas. Qua hai però dà dapli discussiun. Il punct il pli dispitaivel era schebain la lescha saja exacta avunda u sche quella saja vegnida lavurada or memia spert e sut influenza da lobbying da las assicuranzas.

Per l’iniziativa davart vatgas cun cornas aveva la suprastanza da la partida gia decis ordavant da prender la parola Na. Quai senza laschar votar ils delegads surlonder.

RR novitads 06:00