Siglir tar il cuntegn
Inhalt

Votaziuns 25-11-2018 Simpatia per l'iniziativa davart vatgas cun corna

Avessan las Svizras ed ils Svizzers gì da votar l’entschatta october, avessan els acceptà l’iniziativa per vatgas cun cornas e la lescha per survegliar assicurads socials. L’iniziativa da la PPS per l’autodeterminaziun avess fatg naufragi.

Legende: Video Survista trend da votaziuns abspielen. Laufzeit 01:07 Minuten.
Or da Actualitad video dals 19.10.2018.

Quai resulta da l’emprima retschertga da l’institut gfs.berna fatga per incumbensa da la SSR SRG.

GEA a l’iniziativa davart las vatgas cun corna

L’iniziativa che vul subvenziunar purs che tegnan vatgas, taurs u chauras cun cornas vegniss il mument acceptada cun 58%.

L’argument decisiv sch’ina persuna di gea u na a l’iniziativa è surtut la dumonda sch'il far giu las cornas è dolurus per ils animals u betg. Quella respundan il mument 57% cun gea. L'argument decisiv per refusar l’iniziativa è che mintga pur duai decider sez tge ch’è pli adattà per ses bain.

Grafica davart l'iniziativa davart vatgas cun corna.
Legenda: GRAFICA RTR

NA a l’iniziativa per l'autodeterminaziun

L’iniziativa da la PPS che vul metter il dretg svizzer sur il dretg internaziunal vegniss il mument refusada cun 55%. Tenor ils auturs da la retschertga è la polarisaziun aifer las partidas considerabla: Entant ch’ils electurs da la PPS èn cleramain per l’iniziativa, èn ils electurs da tut las ulteriuras partidas per gronda part encunter.

Ils iniziants vegnan surtut da persvader cun l’argument ch’ils dretgs umans ed il dretg internaziunal valian gia en la Constituziun e ch’il pievel svizzer duaja decider tge che valia en Svizra.

Tar ils adversaris persvadan ils arguments ch’il pievel svizzer decidia gia oz davart dumondas impurtantas e che l’iniziativa pericliteschia las relaziuns cun l’exteriur e la reputaziun da la Svizra sco partenari da commerzi fidà.

Grafica davart l'iniziativa per l'autodeterminaziun.
Legenda: GRAFICA RTR

GEA a la lescha per survegliar assicurads socials

L’entschatta october avessan 57% vuschà per la midada da la lescha federala da l’assicuranza sociala.

La lescha che permetta da survegliar ils assicurads socials cun detectivs frunta surtut sin sustegn dals electurs da las partidas burgaisas. Il champ sanester tendescha per gronda part ad in na.

En general sa mussa in tschert conflict tranter las generaziuns: Ils giuvens èn pli critics envers il project. Cunquai sa mussa ina giada dapli che la protecziun da la sfera privata vegn valitada pli auta tar persunas pli giuvnas.

Grafica davart la lescha per survegliar assicurads socials
Legenda: Grafica RTR

La retschertga

Per la retschertga ha l'institut da perscrutaziun bfs.berna dumandà 3772 persunas da tut las regiuns linguisticas da la Svizra. Quai tranter il 1. ed ils 12 d'october 2018.

RR novitads 06:00