Siglir tar il cuntegn

WEF 4'400 schuldads procuran per segirezza a Tavau

Polizia ed armada èn prontas per las sfidas dal WEF. Tavau vegn ad esser durant il WEF in lieu fitg segir. Per quai procuran 4'400 schuldads e la polizia. Quai custa dentant er: Ins quinta cun custs da 9,5 milliuns francs.

Legende: Video Tavau è pront per il WEF abspielen. Laufzeit 1:43 Minuten.
Or da Telesguard dals 22.01.2018.

Il dispostiv da segirezza per il WEF a Tavau da quest onn è pront e vegn a custar 9,5 milliuns francs, quai ha communitgà oz il cumandant da la polizia grischuna, Walter Schlegel. Tavau saja quest'emna in lieu serrà giu cun entradas bain survegliadas.

Per garantir la segirezza èn 4'400 schuldads e policists da tut las 26 polizias chantunalas e dal Principadi dal Liechtenstein en acziun. Da quants policists ch'i sa tracta exact n'è betg vegnì communitgà.

Senza armada nagin WEF

L'armada saja fitg impurtanta per la segirezza durant il Forum economic mundial a Tavau. Senza l'armada na fissi betg pussibel da garantir la segirtad quels dis, ha accentuà Schlegel.

Il mument na datti anc naginas infurmaziuns schebain il president american, Donald Trump vegn al WEF suenter il « Governmental Shutdown» dal venderdi passà. Areguard la visita da Donald Trump collavurian las forzas da segirezza dapi duas emnas cun il «Secret Service» american. Tenor Schlegel funcziunia questa collavuraziun fitg bain.

RR actualitad 12:00