Armada cumenza cun preparativas per WEF

L'armada svizra ha cumenzà cun las preparativas per il Forum mundial d'economia WEF a Tavau. Actualmain gidan radund 340 commembers da l'armada d'installar il dispositiv da segirezza, sco quai che la Polizia chantunala communitgescha.

Armada installescha dispositiv da segirezza a Tavau. Bild in Lightbox öffnen.

Legenda da maletgs: Actualmain gidan radund 340 commembers da l'armada d'installar il dispositiv da segirezza. Keystone

En total pon vegnir en acziun dals 19 fin ils 29 da schaner fin 5'000 schuldads da l'armada svizra. Sco quai che la Polizia chantunala grischuna communitgescha, han ils schuldads da la milissa in'incumbensa logistica sco per exempel il servetsch da sanitad u la regulaziun dal traffic, fertant che la schuldada professiunala surpiglia la segirezza da persunas e las controllas d'entrada. La responsabladad generala per la segirtad al WEF ha il cumandant da la polizia chantunala, Walter Schlegel.

Pervi da la visita dal president american Donald Trump n'ha l’armada survegnì naginas novas incumbensas. Quai ha confermà il pledader da l’armada, Stefan Hofer.

Spazi d'aria segirà

Era il spazi da l'aria vegn segirà da l'armada svizra durant 24 uras. Tenor la Polizia chantunala succeda quai en collavuraziun cun las forzas austriacas. Plinavant transporta l'armada era persunas ch'èn protegidas dal dretg internaziunal. Atterrar na pon ins era quest onn betg be a Kloten, mabain era sin la plazza aviatica da Dübendorf, che vala per quest temp sco cunfin da Schengen.

RR novitads 16:00