Siglir tar il cuntegn

WEF Emmanuel Macron vegn al WEF a Tavau

Il president franzos Emmanuel Macron vegn a sa participar al Forum mundial d’economia WEF a Tavau. Quai ha el annunzià mesemna a Paris. Igl è previs ch'el tegnia in pled, quai probabel ils 24 da schaner 2018.

Emmanuel Macron.
Legenda: Emmanuel Macron a chaschun da la conferenza da pressa da Bumaun ils 3 da schaner 2018 a Paris. Keystone

L’inscunter a Tavau ha lieu dals 22 fin ils 26 da schaner. Macron vegn probabel ad esser preschent ils 24 da schaner. Igl è previs ch'el tegnia in pled. Gia il 2016 è Macron stà a Tavau al WEF, lura sco minister d’economia da la regenza da François Hollande. Lura avev'el appellà a refurmas pli sveltas en Frantscha.

Avant da vegnir en Svizra, va Macron dentant anc al uschenumnà «Inscunter d'attractivitad per la Frantscha» a Versailles. Quai inscunter duai carmalar firmas britannicas en Frantscha suenter che la Gronda Britannia ha decidì da sortir da l'Uniun europeica.

Emmanuel Macron admonescha

Il president franzos ha era crititgà la mesemna il tun dals Stadis Unids, da l'Israel e da l'Arabia Saudita en connex cun l'Iran. Ils trais pajais sajan en blers reguards alliads da la Frantscha. Lur lingia uffiziala saja dentant ina che mainia a la guerra, ha Macron avertì. I saja impurtant da mantegnair il dialog.

RR novitads 06:00