Siglir tar il cuntegn

WEF Tavau: Nagin plant pervi da pretschs exagerads durant WEF

Durant il Forum mundial d'economia explodeschan ils pretschs per abitaziuns e stanzas da durmir a Tavau. Era persunas privatas vulan profitar e pretendan per part tschains da locaziun enorms. Ina chombra en ina abitaziun da vacanzas po uschia custar svelt 900 francs per notg.

Il signet dal WEF
Legenda: Ils organisaturs dal WEF na vulan tuttina betg purtar plant cunter locataris privats a Tavau. Keystone

Per ils organisaturs dal WEF èn quests pretschs gia dapi in temp in problem. Onn per onn crititgeschan els ils pretschs exagerads e smanatschan era da bandunar Tavau. Il schaner aveva il directur dal WEF Alois Zwinggi ditg a la gasetta «Südostschweiz» ch’el pondereschia dad inoltrar in plant pervi dad usura.

Ma uss na vegn quai tuttina betg tar questa accusaziun. Al schurnal regiunal da Radio SRF ha Zwinggi ditg ch’els hajan analisà la situaziun e la conclusiun saja che talas proceduras cunter persunas privatas sajan charas e portian pauc.

Era ha Zwinggi accentuà ch’els veglian restar a Tavau cun il WEF. Quai ina conferma era en connex cun las votaziuns dals 23 da settember sche la vischnanca duai pajar vinavant in milliun francs per la cumpart dals custs da segirezza.

RR novitads 06:00