Siglir tar il cuntegn
cuntegn

WEF 2019 Far fatschentas en atmosfera svizra

La Svizra è da nov represchentada da vart uffiziala al Forum mundial d’economia a Tavau. Il mardi han quatter cussegliers federals inaugurà il House of Switzerland. Cun fondue u schuppa da giutta duain politichers e represchentants da l'economia s’entupar en la chasa cun l'elita mundiala.

Legenda: Tadlar il audio Avertura House of Switzerland. Durada 02:40 minutas.
02:40 min, Actualitad dals 23.01.2019.

Tavau saja il lieu, nua ch’il mund vegnia ensemen, ha il cusseglier federal Ignazio Cassis ditg tar l’avertura da la nova chasa. Cun il House of Switzerland haja la delegaziun svizra uss er in lieu, nua che manaders da fatschenta svizzers possian s’inscuntrar cun auters schefs da concern – e quai davos ischs serrads. Ils discurs bilaterals en il House of Switzerland duain avair lieu en in ambient patgific e vegnir suttastritgads cun spezialitads culinaricas svizras.

Sper Cassis èn er stads preschents a l'avertura il president da la Confederaziun Ueli Maurer, il minister d’economia Guy Parmelin ed il minister da l’intern Alain Berset. Il House of Switzerland vegn manà dal departament federal d’affars exteriurs – quai cun in budget da 100'000 francs. Planisadas èn quatter occurenzas uffizialas.

RR novitads 06:00