Glindesdi bun’ura è l’autostrada A13 stada serrada tranter Landquart e Zezras per bunamain duas uras, pervi d’in accident. Curt suenter las 05:30 è in automobilist collidà cun la part davos d’in camiun, sco la Polizia chantunala scriva.
L’automobilist ha pudì bandunar ses vehichel. Lura è in segund auto collidà cun l’auto ch'era amez via. Lez automobilist è vegnì transportà en l’Ospital chantunal a Cuira. Omadus autos han in donn total, il camiun in donn da 5'000 francs. Pervi da l’accident hai dà colonnas ed impediments da traffic sin las vias da guntgida.