Il chastè da Zezras vegn duvrà en autra moda. Il chantun dat ina contribuziun da maximalmain 341'450 francs per midar il tract principal dal chastè en abitaziuns. En connex cun questa contribuziun vegn il chastè mess sut protecziun chantunala da monuments. Total duain vegnir investids 17,3 milliuns francs per reutilisar il chastè.
Il chastè da Zezras
En il cas dal chastè da Zezras sa tracti d'in edifizi baroc. Ensemen cun ils edifizis vischins sco era il parc è el in monument architectonic unic en il Grischun. El caracterisescha decisivamain il maletg dal lieu da Zezras ed è d'impurtanza istorica surregiunala. El è vegnì construì tranter ils onns 1670 e 1687, tenor ils plans da l'architect alsazian Kleber per il marschal Johan Rudolf von Salis. L'edifizi principal stat dapi l'onn 1973 er sut protecziun da la Confederaziun.