Tenor Martin Roffler dal post da prevenziun tar la Polizia chantunala èn ils pli gronds sbagls, ch'ils velocipedists emblidan da mussar cun il maun midada da direcziun u er dad ir amez la via cura ch'els vulan ir a sanester u en la rundella.
Correct en la rundella è:
- guardar a sanester che nagin è gia en che ha la precedenza (vala er per automobilists)
- ir amez via tras la rundella per ch'ils autos na possian betg surpassar
- avant che sortir, mussar cun il maun la direcziun
Plinavant fa il policist attent, che omadus stoppian prender resguard in da l'auter. Tranter auter perquai ch'ils automobilists na vesian magari betg bain pervi dal rom da la fanestra. Cun esser attent, hajan ins gia in grond problem pli pauc.
Prevenziun e scleriment enstagl da chastis
Er tar velocipedists saja quai in grond problem ch'els sa fatschentian cun autras chaussas durant l'ir cun velo: telefonin, baiver café, tadlar musica. Per regla vegnan tals velocipedists simplamain admonids e sensibilisads dals privels, uschia Martin Roffler.
Chastis dettia quai be sch'i resguardian p. ex. betg in'ampla cotschna u las barrieras da la viafier. Per uffants dettia quai en quests cas in curs d'ina mesemna suentermezdi nua ch'els emprendan dad ir correct cun il velo.
